Día d’os Dreitos Umanos

Esta entrada también está disponible en: Aragonés Català Español Français English

S.O.S.

Zelda 13 d’a Nueva Gayola Hiperteunolochica de Megaseguridad de Zuera, año 2027.

Umano de l’año 2022. T’escribo dende a mía zelda de l’año 2027 porque maitín me van a matar.
Ayer un alienichena s’infiltró en as nuestras filas y ha desmantelau a zaguera sezión autiva d’a resistenzia. Uei, as doze personas que yeranos reunidas parando o nuestro siguién plan ta derrocar a lo gubierno alienichena imos a estar sozmetidas a la pena de muerte. No i hai abiu garra chuizio, dengún ha abiu de presentar garra preba. Ha bastau con a sospeita que parabanos bella cosa que iba en cuentra d’os intreses d’o gubierno.

He conseguiu colar-me en o sistema de comunicazions intertemporales con l’aduya d’un guarda d’a prisión que, en a uembra, tamién luita por recuperar os dreitos umanos tresbatius. O risgo ye enorme, pero ya no tiengo pon que perder. Tu yes a zaguera asperanza que me queda, umano d’aviento de 2022. Tu has d’intentar evitar as errors que nusatros cometiemos.
Cuan pleguen os fardachos verdes enormes, anque tos digan que vienen en son de paz ta estudiar o planeta, no les creigaz. No son aquí ta fer turismo ni investigando os planetas azuls: quieren invadir-nos.

Cuan le pregunten a la umanidat qué son os Dreitos Umanos Universals, deziz-les que son o vuestro credo, deziz-les que son vinculans y que han de siñar-los y azeutar-los. Deziz-les que, si no los respetan, no pueden dentrar en a Tierra y, si lo fan, se les chuzgará debán d’o Trebunal Intergaláctico.
Nusatros no les diemos importanzia. Agora no somos libres, ni tenemos os mesmos dreitos que os alienichenas. Els nos controlan. Si no yes un cuco verde con coda de fardacho, no puez tener una propiedat, no tiens dreito a la educazión y no yes libre. Somos esclaus d’os fardachos. Dende fa 5 años, nos matan a treballar, nos utilizan como quieren y, si nos negamos, nos torturan dica que azeutamos a suya voluntat.

Queriu umano de l’año 2022. No ignores istas letras. Si han plegau dica tu, busca a Pepe García, en l’año 2026 será o chefe d’a resistenzia. Di-le o que va a pasar. Di-le que a clau ye en a Declarazión d’os Dreitos Umanos. Di-le que, o día que le pregunten, ha de meter-se firme, dezir que no azeutará garra colaborazión que no los guarenzie. En caso contrario, a umanidat será esclavizada en 5 años y probablemén s’extinguirá en 7.

 width=

Confío en tu, umano d’o 2022, a Tierra y a umanidat, son agora en as tuyas manos.

Descripzión

O 10 d’aviento de 1948, l’Asambleya Cheneral d’as Nazions Unidas adoptó a Declarazión Universal de Dreitos Umanos. Un documento que proclama os dreitos inalienables que corresponden a tota persona, independienmén d’a suya raza, color, relichión, sexo, idioma, opinión politica u d’unatra mena, orichen nazional u sozial, posizión economica, naixenzia u cualsequier atra condizión.

As constituzions d’os estaus de dreito y os codigos por os cuals se richen as nuestras soziedaz son basaus en istos prenzipios. Pero ixo no ye sufizién: as menazas y os ataques a los Dreitos Umanos son una realidat debán d’a cuala no podemos quedar-nos de brazos cruzaus. Iste día ha de servir-nos ta recordar que a dignidat umana ye bella cosa innegoziable y que no admite condizions. Os Dreitos Umanos son una conquiesta, pero as conquiestas han d’estar mantenidas y ye nuestro aber de cusirar y evitar a vulnerazión d’ixos dreitos. En o día a día, en o nuestro entorno más cutiano… toz y totas somos importans.

 class=

Más informazión

Os obchetivos y contenius d’ista propuesta tienen muitas conisions con atras commemorazions. Talmén os más evidens sigan os vinculaus a o Día Internazional en memoria d’as Victimas de l’Holocasto y Prevenzión de Crimens contra a Umanidat (27 de chinero), a o Día da Zero Discriminazión (1 de marzo) y a o Día Mundial contra o Treballo Infantil (12 de chunio). Tamién puede aludir-se dende aquí a lo Día Internazional d’o Migrán (18 d’Aviento), a lo Día Internazional d’os Treballadors (1 de mayo) y a o Día Internazional de Refirme a las Victimas d’a Tortura (26 de Chunio).

En Aragón…

As valors universals tienen una primer armiella en l’ambito local. En as Cortes d’Aragón se deposita a voluntat d’a ziudadanía aragonesa d’organizar a suya convivenzia. En ellas funziona una Comisión de Comparezenzias Ziudadanas y Dreitos Umanos, en a cuala personas fisicas u representans de personas churidicas (asoziazions, fundazions, colectivos sozials…) pueden concorrer ta esponer problemas concretos que requieran bel tipo de soluzión.

Unatra instituzión de gran importanzia en a nuestra comunidat autonoma ye O Chustizia d’Aragón. A ella le dedicaremos más atenzión o prosimo día 20, pero no podemos olbidar que O Chustizia s’encarga de cusirar l’aplicazión d’as leis conforme a dreito, y que astí se conta con o complimiento d’ixos prenzipios universals que son os Dreitos Umanos. Numerosos informes dan idea de tot ixo. Por exemplo, iste Informe Añal d’o Chustizia sobre a Infanzia y l’Adoleszenzia.

Un detalle

Amás d’as instituzions ofizials (Nazions Unidas, Unesco, etz.) dedicadas a l’atenzión permanén a los Dreitos Umanos, i hai tamién muitas organizazions no gubernamentals y muitos atros coleutivos que veilan por os mesmos en diferens escalas y puestos. Entre ellas, destacamos a dos entidaz d’implantazión en tot o mundo que dende fa muitos años desempeñan una labor fundamental.

Una reflesión

O tema zentral d’o Día d”os Dreitos Umanos en 2021 yera relazionau con a “Igualdat” y l’articlo 1 d’a Declarazión Universal de Dreitos Umanos, “Toz os seres umanos naxen libres y iguals en dignidat y dreitos”.

Os prenzipios d’igualdat, d’inclusión y de no discriminazión son a esenzia d’os dreitos umanos. A igualdat ye aliniada con l’Achenda 2030 y con un enfoque que incluye abordar y trobar soluzions ta formas enradigadas de discriminazión que han afectau a las personas más vulnerables d’as nuestras soziedaz.

Proposas ta o/a profesor/a

A defensa d’os Dreitos Umanos ye un elemento troncal que afeuta a muitas realidaz y cuenta con numerosas fazetas. Como emos visto, puede estar relazionada con contenius amostraus en atras calendatas. Por iste motivo, as propuestas didauticas son versatils en diferens sentius.

A calendata de uei (8 de chulio) agún no se conoxe o lema d’o Día d’os Dreitos Umanos 2022. Manimenos, o lema de 2021 (a lo que s’ha feito alusión en a explicazión cheneral), “Igualdat”, tiene muitas posibilidaz. En ixe sentiu, puede treballar-se o conteniu d’istas intervenzions:

Se pueden proponer autividat en l’aula (comentarios de puntos concretos, breus esposizions, relazión con feitos cutianos, exemplos, etz.) arredol d’o testo d’a Declarazión Universal d’os Dreitos Umanos

 width=
Edizión ilustrada d’a Declarazión Universal de Dreitos Umanos

Se puede sucherir una busqueda de notizias, de declarazions de personas famosas arredol d’a defensa de dreitos, tratamiento en meyos de comunicazión… Nomás como botón de muestra (i hai muitos atros exemplos), a frase d’a cantán Chanel (representán d’España en Eurovisión 2022) en o suyo pregón d’a Fiesta de l’Orgüello en Madrit: “Cuesta muito adubir dreitos y ye masiau fazil perder-los”.

Elemento transversal incluyiu en o currículo

Desembolique d’as valors que fomenten a igualdat efeutiva entre ombres y mullers y a prevenzión d’a violenzia de chenero, y d’as valors inerens a lo prenzipio d’igualdat de trato y no discriminazión por cualsequier condizión u zircunstanzia personal u sozial. Se fomentará l’aprendizache d’a prevenzión y resoluzión pazifica de conflictos en toz os ambitos d’a vida personal, familiar y sozial, asinas como d’as valors que sustienen a libertat, a chustizia, a igualdat, o pluralismo politico, a paz, a democrazia, o respeto a os dreitos umanos y o refuso a la violenzia terrorista, a pluralidat, o respeto a lo Estau de dreito, o respeto y considerazión a las victimas doo terrorismo y a prevenzión d’o terrorismo y de cualsequier tipo de violenzia. (…). A programazión dozén ha de comprender en tot caso a prevenzión d’a violenzia de chenero, d’a violenzia terrorista y de cualsequier forma de violenzia, razismo u xenofobia, incluyiu o estudio de l’Holocausto chodigo como feito istorico. S’evitarán os comportamientos y contenius sexistas y estereotipos que supongan discriminazión. O currículo incorpora elementos relazionaus con o desembolique sostenible y o meyo ambién, os risques d’explotazión y abuso sexual, l’abuso y maltrato a las personas con discapazidat, l’enresto escolar, as situazions de risque derivadas d’a utilizazión d’as Teunolochías d’a Informazión y a Comunicazión, asinas como a protezión debán d’emerchenzias y catastrofes.

 class=
 class=

Obchetivos que aduya a complir ista proposa

ESO:
  • Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
  • Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra a muller.
Bachillerato:
  • Exerzer a ziudadanía democratica, dende una perspeutiva global, y aldquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
  • Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
  • Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra la muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.

Materias con as cualas puede vincular-se

  • Valors eticas (ESO, 1er y 2º ziclos)
  • Educazión ta la ziudadanía y os dreitos umanos (ESO, 2º ziclo)
  • Bachillerato: A asignar en funzión de modalidat

Desembolique de competenzias

  • Competenzias sozials y zivicas