Esta entrada también está disponible en: Aragonés Català Español Français English
INAZIÓN
T’he de contar una cosa. No ye fazil de contar. A mía mente ha borrau muitos d’os detalles, pero recuerdo que yera en o recreyo d’o mío colechio y recuerdo mui bien a cara d’a mía compañera. No recuerdo qué i eba pasau, no sé qué desencadenó aquella situazión, pero cuanto más lo pienso, más esgarrifosa me resulta.
Ella yera en o zentro d’o patio y muitos compañers empezoron a escupir-le. Os escupitos se suzedeban en a suya cara, un dezaga d’unatro. Creigo que l’atrivimiento d’os primers animó a atros a seguir os mesmos trangos y escupir tamién. M’alcuerdo d’a suya cara roya y d’os uellos plorosos cubiertos por a saliva d’os demás y recuerdo que caminaba firme ta la salida ta marchar-se d’allí cuanto antes.
M’esforzo por olbidar-lo. Tasamén suporto a vergüeña que me causa. Yo no escupié. No le escupié a la cara, pero tampoco fazié pon ta defender-la. Ixo m’avergoña fundamén.
Lo zierto ye que ya en aquel momento, tasamén comprendié a situazión. Siempre he iu muito a la mía bola y seguramén aquel día, un más de tantos, tamién yera a la mía bola. Probablemén por ixo no recuerdo qué prevocó que plegasenos a ixe punto.
Le doi vueltas y me viene tot o rato una pregunta a la cabeza: Qué más da cómo empezase ixo? Qué podría aber feito aquella zagala de 12 años que merexese a rebaixada a la cuala la sozmetioron os compañers de clase? Qué cal fer en un recreyo ta que no te quede más remeyo que sofrir dezenas d’escupitos cayendo-te en a cara?
No sé a tu, pero a yo no me convenze garra respuesta. Si a yo me cuesta escribir-lo, te prexinas o daño que abió de fer-le a ella? Te prexinas aber-lo sofierto tu?
A Unesco ha designau un día como o Día Internazional contra a Violenzia y l’Enresto en a Escuela (sigue leyendo ta descubrir cuál), pero tu vas a clase toz os días y yo creigo que lo millor sería que toz y cadagún isen o día contra l’enresto en a escuela. Dengún no se lo merexe.
Descripzión
A Unesco designó o primer chueves de noviembre de cada año como Día Internazional contra la Violenzia y l’Enresto en a Escuela, incluyiu o Ziberacoso, reconoxendo asinas que a violenzia en l’entorno escolar baixo totas as suyas formas (bullying) atenta contra os dreitos d’os ninos y os adoleszens, a salut y o bienestar. A Unesco fa un clamamiento a los estaus miembros, a organizazions internazionals y rechionals intresadas, asinas como a la soziedat zivil, incluyidas as organizazions no gubernamentals, as personas y atras partes intresadas a amprar aduya en a promozión, organizazión y zelebrazión d’iste día internazional.
L’obchetivo ye sensibilizar a las personas sobre o problema d’a violenzia en rez y o ziberacoso y as suyas consecuenzias, y sobre a nezesidat de meter-les fin. Tamién apela a los miembros d’a comunidat educativa, a las autoridaz y a seutors relazionaus como lo d’as teunolochías, a amprar atenzión a iste problema ta enzurizar-los a contribuyir a la prevenzión d’a violenzia en linia, con a intención de guarenziar a seguranza y o bienestar de ninos, ninas, adoleszens y chovens.
Más informazión:
Os contenius y obchetivos d’ista propuesta consonan parzialmén con os d’o Día Internazional d’a Educazión (24 de chinero) y o Día Internazional d’a Zero Discriminazión (1 de marzo).
En Aragón
En a nuestra comunidat autonoma esiste dende 2018 un Observatorio Aragonés por a Convivenzia y contra l’Enresto Escolar. Se trata d’un organo colechiau, de carauter consultivo, d’asesoramiento y partizipativo, que tiene como obchetivo afavorir a convivenzia positiva y a resoluzión constructiva d’os conflictos que se cheneran en a comunidat educativa, con espezial atenzión a las situazions d”enresto.
I hai un telefono contra l’enresto escolar 900 100 456 abilitau por o Gubierno d’Aragón. Funziona 24 oras os 365 días de l’año.
Un detalle
A pachina d’a Unesco dedicada a iste Día Internazional ofrexe visions paralelas, relazionadas con a prevenzión de conflictos y malas prauticas en l’aula. Ye mui interesán por ir un poquet más enta allá, o documento sobre a violenzia de chenero en as aulas.
Una reflesión
L’Obchetivo 4 de l’Achenda 2030 de Desembolique Sostenible d’a ONU avoga por una educazión inclusiva y equitativa de calidat. Ixo será inviable entre que os estudians sigan sofrindo a discriminazión u esperimenten violenzia por motivos d’identidat de chenero y orientazión sexual real u aparén.
A Unesco apoya azions de prevenzión y combate como respuestas d’o seutor educativo a la violenzia y l’enresto homofóbicos y transfóbicos, ya sigan fisicos u psicolochicos. Ixas respuestas han d’estar firmes dende a comunidat educativa, pero a base ye en a educazión temprana.
Propuestas ta o/a profesor/a
Por afeutar a la convivenzia en l’aula y a lo desembolique normal d’o curso, inzidindo direutamén sobre o complimiento d’obchetivos curriculars, l’asunto tratau en iste Día Internazional tiene una transversalidad evidén y prezisa d’una atenzión contina en l’aula y en o zentro.
Se recomienda o treballo espezifico en relazión con aspeutos como os menzionaus en os parrafos anteriors sobre violenzia de chenero, homofóbica y transfóbica y, pro, o treballo en l’aula a partir de documentos audiovisuals como os siguiens:
- No chugues con yo (10-14 años)
- Chuntos contra l’enresto escolar
Se propone tamién a busqueda y comentario de notizias relazionadas con enresto escolar, no nezesariamén (u no en esclusiva) sobre suzesos concretos, sino tamién sobre iniziativas ta neutralizar y aprevenir o problema.
Por exemplo, informes y balanzes (notizia en Heraldo de Aragón). U tamién, notizia sobre una trobada d’alumnau aduyán por a convivenzia en o IES Pablo Gargallo de Zaragoza.
Se recomienda no perder contauto con diferens campañas que, arredol de Nazions Unidas, fundamentalmén en relazión con os Obchetivos de Desembolique Sostenible, se presientan de forma periodica.
Ista propuesta reforza l’empenta a lo desembolique de valors que fomenten a igualdat efeutiva entre ombres y mullers y a prevenzión d’a violenzia de chenero, y d’as valors inerens a lo prenzipio d’igualdat de trato y no discriminazión por cualsequier condizión u zircunstanzia personal u sozial, fomentando l’aprendizache d’a prevenzión de cualsequier tipo de violenzia y a resoluzión pazifica de conflictos. Tamién aduya a promover y difundir os dreitos d’os ninos en l’ambito educativo.
Partizipa de prenzipios metodolochicos como l’atenzión a la diversidat d’os alumnos y una espezial atenzión a la intelichenzia emozional, promovendo un clima d’aula y de zentro que afavoreixca l’equilibrio personal y unas relazions personals basadas en as valors fundamentals de convivenzia, dende a prevenzión de conflictos y a resoluzión pazifica d’os mesmos, asinas como a no violenzia en toz os ambitos.
Obchetivos que aduya a complir ista propuesta
ESO:
- Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra la muller.
- Fortalexer as suyas capazidaz afectivas en toz os ambitos d’a personalidat y en as suyas relazions con os demás, asinas como refusar a violenzia, os prechudizios de cualsequier tipo, os comportamientos sexistas y resolver pazificamén os conflictos.
Bachillerato:
- Exerzer a ziudadanía democratica, dende una perspectiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra la muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
Materias con as cualas puede vincular-se
- Valors eticas (ESO, 1er y 2º ziclos)
- Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas