Esta entrada también está disponible en: Aragonés Català Español Français English
ENTENDER L’ODIO
Te prexinas vivir amagato dezaga d’una paret u debaixo d’o suelo? Me dentra claustrofobia de pensar-lo. Seguro que a tu tamién. M’agobio y quiero pensar en unatra cosa rapido. Pero, si m’atrivo a seguir dando-le vueltas, me doi cuenta que seguramén estar enzarrau y aburriu no yera lo pior de tot, seguramén lo pior yera sentir o espanto que te descubrisen y te matasen en cualsequier momento. No te pareixe? Qué levarías tu pior?
Sin querer, acabo plantiando-me l’odio que debe sentir en o suyo interior belún que les deseya un mal tan orrible a personas que ni sisquiera conoxe y d’as cualas no sentirá fablar nunca. Como exerzizio, ta veyer si lo comprendo, intento prexinar-me a la persona que más aborrezco en o mundo. Me viene a la cabeza o mío chirmán que l’atro día me fazió spoiler con a serie que yera veyendo y sé que nunca le deseyaría pon pareixiu. Talmén m’atrivo con a idea que canzelasen a suya serie favorita u perdese muitos seguidores en Instagram, pero, anque m’empreñase, nunca lo mandaría a un campo de conzentrazión y no entiendo quí podría fer-le ixo a unatro estar umano.
He aluzinau cuan he visto a zifra, arredol de mil aragoneses estioron en campos de conzentrazión. Ni me prexino o que abioron de vivir. Pero sí que sé cómo podría descubrir cualques d’as suyas istorias. Más abaixo veyerás dó.
Descripzión
Chornada de memoria y omenache a las victimas d’o nazismo entre os dezenios de 1930 y 1940 y, por estensión, de denunzia d’os crimens inspiraus por l’odio y por a ostilidat ta lo diverso. Día Internazional instaurau por Nazions Unidas dende 2005, con recomendazión de seguimiento y difusión a las instituzions publicas (espezialmén parlamentos).
Más informazión (con carauter global):
- Pachina web de Nazions Unidas, y dentro d’ella, por exemplo, ista notizia.
- Pachina web d’Holocaust Memorial Day Trust.
En Aragón…
Se zelebra dende 2010 un auto zentral en as Cortes d’Aragón, por iniziativa d’Amical de Mauthausen y Rolde d’Estudios Aragoneses. En él s’enzienden ves-las y se realizan breus intervenzions en memoria y representazión d’os coleutivos que sofrioron con mayor crudeza a deportazión y l’exterminio. Dau o tono educativo y d’aprendizache en ixe contesto, tiene muito peso a partizipazión d’estudians d’Educazión Secundaria.
Informazión de l’auto de 2023 (con cuantos enlazes, entre atros a gravazión d’o suyo desembolique en a canal d’as Cortes d’Aragón), en a web de Rolde de Estudios Aragoneses:
L’asoziazión Sefarad Aragón (que colabora en ixe omenache en representazión d’o pueblo chodigo) tamién gosa organizar por a suya cuenta un auto commemorativo más espezifico y empenta proyeutos (chornadas, cursos, etz.) entre atras epocas de l’año.
Un detalle
Arredol de mil aragoneses y aragonesas sofrioron deportazión a campos de conzentrazión y exterminio. Tamién merexe a pena recordar a labor d’aragoneses que contribuyioron a salvar vidas (como os diplomaticos Ángel Sanz Briz en Hongría y Sebastián Romero Radigales en Grezia).
Más informazión
- Web Aragoneses deportaus a los campos nazis.
- Libro coleutivo Chustizia y Dignidat. Memoria aragonesa de l’Holocausto. Zaragoza, REU, 2020.
Os obchetivos y contenius d’ista propuesta pueden estar relazionaus con os vinculaus a lo Día d’os Dreitos Umanos (10 d’aviento) y a lo Día d’a Memoria Democratica en Aragón (3 de marzo).
Propuestas ta o/a profesor/a
Documental Os zaguers españols de Mauthausen y d’a resta de campos nazis, de Carlos Hernández (2020, 80 menutos).
L’asoziazión Amical de Mauthausen y atros campos conta con una amplia ofierta de charradas y conferenzias, en gran mida endrezadas a lo publico escolar (preferenmén d’Educazión Secundaria y Bachillerato). Tamién ofrexe esposizions, viaches a campos de conzentrazión. Tiene delegazión aragonesa.
L’Amical tiene un proyeuto, o Ret de Memoria Nunca Más que propone treballar con os conzellos, as asoziazions y entidaz de cada munizipio, y con os institutos u zentros educativos, ta implicar a los chovens, y fer-lo a traviés d’as istorias u as biografías d’os deportaus y deportadas de cada localidat.
Sobre Ángel Sanz Briz esiste una filmografía que puede resultar util. Ye referenziada en o libro menzionau Chustizia y Dignidat, pero podemos destacar aquí:
A partir d’istas premisas, puede desarrollar-se una serie d’autividaz endrezadas a l’alunnau: proyezión de bella d’as obras audiovisuals, explorazión sobre bella d’as pachinas referenziadas, plantiamiento d’un senzillo cuestionario ta calibrar a comprensión de contenius, busqueda d’informazión sobre cualques cuestions esgranadas, explorazión sobre esperenzias u memorias arredol de l’asunto en o marco familiar, intercambio d’ideas y opinions, composizión de testo…
Elemento transversal incluyiu en o currículo
Ista propuesta reforza o desembolique de valors inerens a lo prenzipio d’igualdat de trato y no discriminazión por cualsequier condizión u zircunstanzia personal u sozial, y fomenta l’aprendizache d’a prevenzión y resoluzión pazifica de conflictos en toz os ambitos d’a vida personal, familiar y sozial, asinas como d’as valors que sustienen a libertat, a chustizia, a igualdat, o pluralismo politico, a paz, a democrazia, o respeto a los dreitos umanos y o refuso a la violenzia terrorista, a pluralidat, o respeto a lo Estau de dreito, o respeto y considerazión a las victimas d’o terrorismo y a prevenzión d’o terrorismo y de cualsequier tipo de violenzia. (…).
A programazión dozén ha de comprender en tot caso a prevenzión d’a violenzia de chenero, d’a violenzia terrorista y de cualsequier forma de violenzia, razismo u xenofobia, incluyiu o estudio de l’Holocausto chodigo como feito istorico. S’evitarán os comportamientos y contenius sexistas y estereotipos que supongan discriminazión.
Obchetivos que aduya a complir ista propuesta
ESO:
- Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra la muller.
Bachillerato:
- Exerzer a ziudadanía democratica, dende una perspectiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra a muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
Materias con as cualas puede vincular-se
- Cheografía y Istoria / Avalúes eticos (ESO, 1er y 2º ziclos)
- Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
Competenzias sozials y zivicas