Día Mundial contra o Treballo Infantil

Esta entrada también está disponible en: Aragonés Català Español Français English

PASO DE DEBERS, U… NO?

De dó saliba tanta ilusión por ir a clase?

L’atro día conoxié a la mía nueva compañera de clase y me quedé flipada cuan m’empezó a preguntar freneticamén por totas as cosas que veyeba en l’aula: Qué son ixas cartulinas? Se pueden utilizar ixos rotuladors? Qué mete en a pizarra? Tu sabes qué significan ixas letras?

A yo me cuaca veyer a los míos amigos en clase, pero ye que soi farta de debers y exerzizios y no me podeba esplicar tanta emozión. No se daba cuenta que ixo que meteba en a pizarra s’iba a traduzir tarde u luego en uns interminables exerzizios de mates y un treballo ta lo finde?

Asinas que se lo pregunté: “Pero, por qué yes tan emozionada?”. Y nunca m’ese prexinau o que m’iba a contestar: “Ye que yo nunca eba iu a clase”.

A lo prenzipio me pareixió una pasada, no ir a clase! Qué guay! Pasar-se o día con a Nintendo u con a Play. U agún millor, estar en o parque con os de clase y chugar partius, ir a lo zentro comerzial u a lo parque d’atrazions. Y lo millor de tot: no fer debers!

Cada segundo que pasaba la entendeba menos y le pregunté cómo podeba estar que le apetexese ir ta lo colechio, no preferiba seguir sin ir y quedar-se en casa chugando a la Play u veyendo a tele?

Y de sopetón, en contestar-me, lo comprendié tot: “Ye que no podeba, eba d’ir a treballar”.

Florenzia eba abiu de treballar dende mui chica ta aduyar a la suya familia. Me contó alavez que i hai ninos que son obligaus a treballar dende os zinco años y que ella eba abiu d’encañar y desencañar en os cautibos de tabaco cuan teneba 8.

De sopetón, en sentir-la esplicar-me-lo, me dentroron unas ganas locas de fer os debers y quitar buenas notas y empezé a responder con entusiasmo a totas as suyas preguntas y a contar-le o que gosábanos fer en clase. Puede que chugar a la consola tot o día siga tentador, pero si l’alternativa ye treballar en os cautibos de tabaco, dica m’empeza a pareixer una suerte aber d’estudiar o cabo de semana.

 width=

Sabes cuántos ninos i hai en o mundo que treballan como si estasen adultos? Descubre más abaixo y fixa-te en as iniziativas que esisten ta erradicar-lo.

Descripzión

Uei día, 160 millons de ninos (un diez por ziento d’a poblazión infantil mundial) son levando a cabo chornadas laborals d’adulto. Lo fan abitualmén en una situazión d’absoluta precariedat, con unas condizions indignas de seguranza y ichiene, suportando orarios extenuans y inumanos… en cuenta d’estar formando-se como ziudadanos y ziudadanas, rezibindo una educazión que les aduye a afrontar o futuro.

Iste Día mundial mete l’alarma debán d’una situazión d’absoluta inchustizia que reflexa una extrema vulnerabilidat. Ye nezesaria una inversión dezidida en plans de protezión sozial, pero tamién politicas globals y integrals que neutralizen a desigualdat y a pobreza que son en a base d’iste problema.

Más informazión
 class=
En a pachina web de Nazions Unidas

Os obchetivos y contenius d”ista propuesta tienen muitas conisions con atras commemorazions. Os más evidens son o Día Universal d’o Nino (20 de noviembre) y o Día d’os Dreitos Umanos (10 d’aviento), pero tamién s’orienta ta valors vinculadas a los días internazionals de l’Alfabetizazión (8 de setiembre), ta la Erradicazión d’a Pobreza, (17 d’octubre), d’a Educazión (24 de chinero), y d’os Treballadors (1 de mayo).

En Aragón…

O Servizio d’Atenzión a la Infanzia y a l’Adoleszenzia, integrau en l’Instituto Aragonés de Servizios Sozials, ye l’organo de l’Alministrazión d’a nuestra comunidat autonoma encargau de declarar situazions de risgo y desemparo de menors, determinando medidas de protezión a establir en cada caso y promovendo estratechias de prevenzión y reinserzión. A Lei 12/2001, de 2 de chulio, d’a Infanzia y l’Adoleszenzia en Aragón, amparada en  a Constituzión Española y en atras convenzions, estableix un marco normativo cheneral que guarenzia a los ninos y adoleszens d’Aragón l’exerzizio y desembolique d’os dreitos que legalmén les corresponden. Se les considera suchetos autivos de dreitos y personas singulars protagonistas d’a suya istoria: no son patrimonio de dengún ni pueden estar obcheto de discriminazión por razón de sexo, edat, condizión, idioma, relichión, etnia, carauteristicas sozioeconomicas d’os suyos pais u familia, ni por cualsequier atra zircunstanzia. Os ninos y adoleszens tienen dreito a una protezión que guarenzie o suyo desembolique integral como personas en o sino d’una familia si ye posible, pero a protezión ye cosa de toz.

 class=

En a nuestra comunidat autonoma, 51 organizazions constituyen o Ret Aragonés d’Entidaz Sozials ta la Inclusión. Totas ellas tienen como finalidat prenzipal treballar autivamén en favor d’a ziudadanía aragonesa por medio de programas d’inclusión sozial en benefizio d’os coleutivos más desemparaus (infanzia y pobreza dentran en ixe plano). En paralelo, atras entidaz que treballan a libel mundial en un plano más concreto arredol d”a infanzia, como Unicef, tienen delegazión en Aragón.

Un detalle

En mayo de 2022 se zelebró en a ziudat sudafricana de Durban a V Conferenzia Mundial sobre a Erradicazión d’o Treballo Infantil, en a cuala se fazió publico un Clamamiento a l’Azión, representando un compromiso internazional ta la eliminazión d’iste problema. En a pachina web d’a Internazional d’a Educazión (IE) i hai informazión mui detallada.

 class=

Una reflesión

Toz os ninos tienen dreito a la salut, a educazión y a protezión. En o nuestro mundo desarrollau, a realidat de desemparo d’a infanzia pareixe quedar reduzida a ambiens mui marguinals que, con ixo y con tot, contan con una cobertura. Pero en atros puestos azotaus por una pobreza endemica, por guerras, ezetera, a explotazión infantil sigue estando cheneralizada. Anque en os zaguers años se veniba dando una dinamica positiva, reduzindo-se ixas zifras… más rezienmén as diferens crisis globals (sanitarias, economicas, belicas…) han revertiu ixa tendenzia, agudizando o problema. Millons de menors d’edat veyen cómo as suyas oportunidaz de creximiento personal se veyen reduzidas por o país, o chenero u as zircunstanzias en as cualas naxioron.

Propuestas ta o/a profesor/a

Iste asunto afecta direutamén a lo mesmo segmento d’edat en o cual se troban alumnos y alumnas. Ixo puede fazilitar a inserzión d’o problema d’o treballo infantil en l’aula, potenziando a reflesión y a busqueda responsable d’alternativas y soluzions.

Una senzilla introduzión a l’asunto, en un breu clip d’a Organizazión Internazional d’o Treballo: 100 años 100 vozes. O treballo infantil en primera persona

En a zitada pachina web d’a Internazional d’a Educazión i hai muito material didautico disponible (manuals y recursos, muitos d’els en colaborazión con o Programa Internazional ta la Erradicazión d’o Treballo Infantil d’a Organizazión Internazional d’o Treballo). Por exemplo: Sindicatos y treballo infantil. Una ferramienta ta l’azión, entre muitos atros, a los cuals puede azeder-se a traviés de palabras clau (como “treballo infantil”) en a busqueda d’a pachina de IE.

Afondando en a relazión interchenerazional, de forma similar a cualques aspeutos plantiaus en atras calendatas, se puede animar a l’alunnau a que indague en as suyas casas, entre os suyos mayors… espezialmén con lolos y lolas, cómo estió a suya educazión, si abioron de meter-se a treballar de ninos, a qué edat…

Entre diferens recursos disponibles en linia, pueden tratar-se os siguiens:

 class=
 class=

Tamién se pueden ficar conzeptos arredol de consumo responsable: talmén beluns d’os productos que consumimos aigan contau en o suyo prozeso con treballadors infantils en países d’o Terzer Mundo.

Ista propuesta tiene un carauter transversal en o currículo. Aduya a desarrollar valors que fomenten as valors inerens a lo prenzipio d’igualdat de trato y no discriminazión por cualsequier condizión u zircunstanzia personal u sozial, incorporando elementos relazionaus con os risgos d”explotazión y abuso.

Obchetivos que aduyan a complir ista propuesta

ESO:
  • Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
  • Fortalexer as suyas capazidaz afeutivas en toz os ambitos d’a personalidat y en as suyas relazions con os demás, asinas como refusar a violenzia, os prechudizios de cualsequier tipo, os comportamientos sexistas y resolver pazificamén os conflictos.
Bachillerato:
  • Exerzer a ziudadanía democratica, dende una perspectiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
  • Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
  • Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra la muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
  • Conoxer y avaluar criticamén as realidaz d’o mundo contemporanio, os suyos antezedens istoricos y os prenzipals fautors d’a suya evoluzión. Partizipar de forma solidaria en o desembolique y millora d’o suyo entorno sozial.

Materias con as cualas puede vincular-se

  • Valors eticas (ESO, 1er y 2º ziclos)
  • Educazión ta la ziudadanía y os dreitos umanos (ESO, 2º ziclo)
  • Bachillerato: A asignar en funzión de modalidat

Desembolique de competenzias

  • Competenzias sozials y zivicas