Esta entrada también está disponible en: Aragonés Català Español Français English
NO YE FAZIL ESTAR VERDE
Soi un can verde. Que sí, que sí. Soi can y soi verde. Soi un husky siberiano verde. En cuenta de tener ixe pelache blanco y negro tipico d’os huskies, o mío ye verde. No l’he triau yo, no me tinto ni pon. Ye solo que naxié asinas sin yo poder fer pon a lo respeuto. U siga, que soi un can verde.
Normalmén, tot o mundo adora a los cans como yo: grans, fuertes, autivos, proteutors d’a ramada. De no estar que sigas verde. Si yes verde, a tot o mundo le da igual que sigas gran, suave, o más fuerte, o más autivo y que protechas a la ramada como nunca dengún eba protechiu nunca a la tuya familia porque, debán de tot, yes verda.
Lo sé porque l’he viviu en os míos perrunas carnes. Una familia m’adoptó fa uns años y intenté estar o millor can d’o mundo: o más leyal, o millor amigo de toz y presto a tot por aduyar a cualsequier familiar d’o zagal que m’adoptó. Pero cuan a suya lola me veyió, tot o mío esfuerzo le dio completamén igual: “Pero cómo vas a protecher tu a la mía familia? No veyes que yes verde?”.
Y teneba razón. Si m’ese dito que yera mal can, abría puesto rebatir-lo. Le abría dito que sigo o credo d’o can a lo piet d’a letra y que nunca se m’ha conoxiu por dixar a la mía ramada desprotechida. Pero no dizió ixo, dizió que yera verde, y debán d’ixe feito irrefutable, no sabié qué dezir. Asinas que abié d’ir-me d’aquella casa.
Si m’esen saliu as palabras, m’abría cuacau dezir-le que, anque siga verda, soi tan can como cualsequier unatro, rolde, ladro, me curruco en o sofá y fatío igual que cualsequiera. O verde nomás ye una color que, por motivos allenos a lo mío control, ha acabau en o mío pelache.
M’abría encantau dezir, pero cuan veigo ixa fito-fito de fastio y sospresa desimulaus que me meten a vezes, me gosa ocurrir que me quedo sin palabras. Qué les soltarías tu? Les dirías que intentasen dixar de mirar-te o pelache y precurasen conoxer-te? Cuesta muito convenzer-los porque se nos ha mostrau a toz que un can verde ye una cosa rara, a que has sentiu a esprisión? Yes más raro que un can verde. Si l’has sentiu tota a vida, ye normal pensar-lo, no?
Pero qué pasa si yes un can verde? Que te poses fatal, una autentica piltrafa que no se merexe o respeto de no dengún, ixo ye o que plegas a pensar cuan lo unico que veyen de tu ye que yes verde, u amariello, u negro, u musulmán, u homosexual u pobre. No conta ta cosa que siamos buens cans? U buenos umanos?
Descripzión
Dende 2014, se zelebra en ista calendata o dreito de totas as personas a vivir una vida plena y productiva con dignidat. O Día d’a Zero Discriminazión pretende fomentar a inclusión, a solidaridat y a paz y, sobre tot, aduyar a chenerar cambios que faigan posible una soziedat más sostenible.
O dreito a la no discriminazión implica que totas as personas reziban un trato digno: que se respete a suya autonomía, privazidat y confidenzialidat, y que se les guarenzie l’ausenzia de coazión y abuso en igualdat de condizions.
Con a vista mesa en a defensa d’os dreitos umanos y as libertaz fundamentals, se fa espezial fincapiet en a dignidat de totas as personas independienmén d’as suyas opzions afeutivas y sexuals y d’a suya identidat de chenero. Ye una chornada empentada dende o Programa Conchunto d’as Nazions Unidas sobre o VIH/SIDA, ONUSIDA (UNAIDS en as suyas siglas en anglés).
Más informazión
- En a pachina web d’ONUSIDA, O Día d’a Zero Discriminazión.
Os contenius y obchetivos d’ista proposa consonan parzialmén con os d’o Día Internazional contra a Violenzia y l’Enresto Escolar (primer chueves de noviembre) y con os d’o Día d’os Dreitos Umanos (10 d’aviento). Tamién alza relazión con o Día Mundial de Luita contra o SIDA (1 d’aviento).
En Aragón…
Aquí, dende fa uns años, diferens entidaz (colectivos LGTBIQ+, sindicatos, organismos ofizials, a Universidat, organizazions no gubernamentals, etz.) gosan organizar autos, chornadas, mesas informativas… como una forma de conzenziar sobre a diversidat y amostrar refuso a la discriminazión en cualsequiera d’as suyas formas.
Dillá d’o significau concreto d’a calendata, en Aragón contamos con o Espazio d’Atenzión ta la Igualdat y No Discriminazión, dependién d’o Servizio d’Igualdat d’a Direzión Cheneral d’Igualdat y Familias, que tiene como misión levar a cabo as actuazions y midas que, en l’ambito de l’alministrazión d’a nuestra comunidat autonoma, contribuigan a la promozión d’a igualdat de trato y a no discriminazión.
Dende iste enlaz se puede azeder a los recursos que dita Direzión Cheneral mete a la disposizión de totas as personas que demandan azeso a belún d’os servizios d’igualdat u presientan una quexa por aber sofierto un incidente discriminatorio.
Un detalle
As diferens zelebrazions de cada año inziden en diferens aspeutos y detalles que permiten conzentrar o foco d’atenzión en els. Dica agora han estau:
- 2014. Unir a la transformazión
- 2015. Ubrir a lo mundo, tiende a mano
- 2016. Esferenzía-te
- 2017. Fe-te sentir, por a #cerodiscriminación
- 2018. Discriminas?
- 2019. Mobiliza-te ta cambiar as leis discriminatorias
- 2020. Zero discriminazión contra as mullers y as ninas
- 2021. Meter fin a las desigualdaz
- 2022. Eliminemos as leis que perchudican, creyemos leis que empoderan
- 2023. Despenalizar salva vidas
Una reflesión
ONUSIDA sintetiza os esfuerzos de cuantos organismos de Nazions Unidas ta intentar erradicar a epidemia d’o VIH/SIDA, plantiar estratechias y contrarrestar o estigma que suporta. Dende a suya aparizión fa uns cuaranta años, os coleutivos que más han sofierto ixa enfermedat (homosexuals y drogodependiens) han estau culpabilizaus, cuan a realidat ye la d’una enfermedat cruel, que s’ha levau millons de vidas y que tiene espezial inzidenzia en os países d’o Terzer Mundo.
O SIDA ye un problema de salut publica, pero tamién reflexa desigualdaz sozials, desequilibrios mundials, y conzentra prechudizios, esconoximiento y discriminazions en torno suyo. Por ixo, ye lochico que en iste ambito surta fablar de “zero discriminazión”. Entre os diferens recursos y publicazions que ofrexe a pachina d’ONUSIDA, puede veyer-se o reportache “Partizipazión d’a UE en l’Alianza Mundial en o Día d’a Zero Discriminazión”.
Propuestas ta o/a profesor/a
En o Programa Conchunto d’as Nazions Unidas sobre o VIH/SIDA (ONUSIDA) s’achutan os esfuerzos d’11 organizazions d’as Nazions Unidas: ACNUR, UNICEF, PMA, PNUD, UNFPA, ONUDD, ONU Mullers, OIT, UNESCO, OMS y o Banco Mundial. Puede investigar-se a qué entidaz pertenexen ixas siglas y propiziar una conversazión sobre a relazión de cadaguna d’ixas organizazions.
Se recomienda no perder contacto con diferens campañas que, arredol de Nazions Unidas, fundamentalmén en relazión con os Obchetivos de Desembolique Sostenible, se presientan de forma periodica. Por exemplo, vesitar y reflesionar sobre contenius como os ofrexius en a web “Refirme positivo”.
Ista propuesta tiene una evidén transversalidat y prezisa d’una atenzión contina en l’aula y en o zentro. Reforza l’empenta a lo desembolique de valors que fomenten a igualdat efeutiva entre ombres y mullers y a prevenzión d’a violenzia de chenero, y d’as valors inerens a lo prenzipio d’igualdat de trato y no discriminazión por cualsequier condizión u zircunstanzia personal u sozial, fomentando l’aprendizache d’a prevenzión de cualsequier tipo de violenzia y a resoluzión pazifica de conflictos.
Partizipa de prenzipios metodolochicos como l’atenzión a la diversidat d’os alumnos y una espezial atenzión a la intelichenzia emozional, promovendo un clima d’aula y de zentro que afavoreixca l’equilibrio personal y unas relazions personals basadas en as valors fundamentals de convivenzia, dende a prevenzión de conflictos y a resoluzión pazifica d’os mesmos, asinas como a no violenzia en toz os ambitos.
Obchetivos que aduya a complir ista proposa
ESO:
- Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra la muller.
- Fortalexer as suyas capazidaz afeutivas en toz os ambitos d’a personalidat y en as suyas relazions con os demás, asinas como refusar a violenzia, os prechudizios de cualsequier tipo, os comportamientos sexistas y resolver pazificamén os conflictos.
Bachillerato:
- Exerzer a ziudadanía democratica, dende una perspectiva global, y alquirir una conzenzia zivica responsable, inspirada por as valors d”a Constituzión española, asinas como por os dreitos umanos, que fomente a corresponsabilidad en a construzión d’una soziedat chusta y equitativa.
- Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra a muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
Materias con as cualas puede vincular-se
- Valors eticas (ESO, 1er y 2º ziclos)
- Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas