Esta entrada también está disponible en: Aragonés Català Español Français English
A FACHENDA DE PIXAR
Te prexinas que a partir de mañanada nos dezisen a toz que cada familia nomás puede utilizar 30 litros d’augua a lo día?
Con o temeta que no para de fer calor y d’aber inzendios y que denzima no pleve ni a tiros, l’atro día, entre amigos, se nos ocurrió que talmén dentro d’uns años podríanos empezar a tener restrizions d’augua. Te lo prexinas?
No sería tan raro que, si a cosa sigue empiorando, plegase o día en o cual tenesenos un contador en casa que nos limitase, por exemplo, a 10 litros por persona a lo día. En qué gastarías os tuyos?
Talmén pasabanos a duchar-nos cada dos días. Yo creigo que sería millor implantar a ducha un día concreto ta toz, porque asinas, anque un ulorase, os de demás tamién ulorarían y se notaría menos. Bueno, ixo ya ye.
Luego lavar os platos. A veyer, a yo dixar de fregar no m’importaría pon, a verdat. Talmén nos pasamos toz a lo platos desechables y asinas s’acabó o tema. Un poquet caro saldría.
Me preocupa o tema de pixar y atras cuestions mayors porque cada vez que tiramos d’a cadena ixo pueden estar 7 litros d’augua y a yo no me salen as cuentas. Aspero que no sigas de deposizión frecuén, porque vas a aber de prener dezisions difizils. Fixo que luego s’empezaría a vender augua a pres exorbitados. Me prexino as botigas de fachenda en plan un bolso de Louis Vuitton (ya sabes, un luisvi) y a lo costau una barral d’augua: 2000 €.
Te prexinas aber de preocupar-te de tot isto cada día d’a tuya vida? No d’o luisvi, sino d’en qué gastas l’augua y cuánta gastas. I hai 2200 millons de personas en o mundo que lo fan. Cómo? No me lo preguntes porque ni me foi a la idea, pero puez seguir leyendo ta saber más.
Descripzión
O Día Mundial de l’Augua se zelebra cada 22 de marzo ta recordar a relevanzia d’iste liquido esenzial. Tot y que totas as actividat sozials y economicas dependen en gran mida d’o fornimiento d’augua dulza y d’a suya calidat, 2.200 millons de personas viven sin azeso a augua potable. Ista zelebrazión tiene por obchetivo conzenziar sobre a crisi mundial de l’augua y a nezesidat de buscar midas ta abordar-la.
O seiseno d’os Obchetivos de Desembolique Sostenible de Nazions Unidas ta 2030 ye “Guarenziar a disponibilidat d’augua y a suya chestión sostenible y o saniamiento ta toz”. I hai abiu progresos a la ora d’enamplar l’azeso a augua potable y saniamiento, pero agún esisten milars de millons de personas (prenzipalmén en arias rurals) que agún mancan d’istos servizios basicos.
En tot o mundo, una de cada tres personas no tiene azeso a augua potable salubre. Dos de cada zinco personas no disposan d’una instalazión basica destinada a lavar-se as manos con augua y sabón.
Más informazión
Os obchetivos y contenius d’ista propuesta pueden estar relazionaus con atras dos calendatas ta las cualas i hai conteniu espezifico: Día Internazional contra o Cambio Climatico (24 d”octubre) y Día Mundial d’o Meyo Ambién (5 de chunio). Destaquemos tamién a zelebrazión d’o Día Mundial d’a Salut (7 d”abril) y d’o Día Mundial de Luita contra a Desertificazión y a Sequera (17 de chunio).
Un detalle
En 2023, Naziones Unidas zentra o lema d’iste Día Mundial en a nezesidat de “azelerar o cambio”. No se puede seguir como dica agora: os problemas que se troban a o largo d’o ziclo de l’augua son escavonando o progreso en os prenzipals problemas d’a planeta: as guerras, a fambre, as esferras naturals, as crisis sanitarias… Afeuta a la igualdat de chenero, a o mundo laboral, a educazión, a industria, as esferras naturals… A escasez d’augua ye un problema global.
A Conferenzia d’a ONU sobre l’Augua 2023 (22-24 de marzo, Nueva York) ha siñalau un camín ta mirar soluzions a la crisis autual de l’augua y o saniamiento. Os compromisos alcordaus en ixe foro constituyen l’Achenda d’Azión de l’Augua, un plan rapedo y transformador en o cual tamién puede estar reflexada l’azión individual de toz y totas.
En Aragón…
En o nuestro territorio, l’augua ye un elemento fundamental que sobrepasa lo meramén material y dentra en o terreno d’a psicolochía sozial. A identidat aragonesa, as muitas ideas que recorren l’imachinario aragonés, son travesadas por l’augua: por a nezesidat de convertir-la en futuro, por o sentimiento de pertenenzia. “Polvo, boira, aire y sol, y do i hai augua, un ortal”, diz a canta. En a nuestra istoria más rezién, as campañas en defensa de l’augua, a luita contra o trescole, os debates arredol d’a politica hidraulica, os reganos, as inundazions de lugars por paúls… en un sentiu u en unatro, l’augua ye siempre presén.
A chestión d’un elemento tan importán ha de corresponder a los poders publicos. L’Instituto Aragonés de l’Augua ye una entidat de dreito publico que s’adscribe a lo departamento competén en materia d’auguas d’o Gubierno d’Aragón, y que tiene por obcheto l’exerzizio d’as potestaz, funzions y servizios de competenzia de l’Alministrazión hidraulica d’a nuestra comunidat autonoma.
L’evento d’alcanz mundial más importán levau a cabo en Aragón en o zaguero sieglo estió a Esposizión Internazional 2008, cual tema zentral estió… l’augua.
L’augua conecta lo local (as nezesidaz d’una comunidat) con lo global, pus as politicas en relazión con l’augua son de carauter planetario.
Una reflesión
Dende o prenzipio d’os tiempos y ta siempre, l’augua ye vida. Ye un elemento tan cruzial y esenzial que ye presén en varios d’os obchetivos de desembolique sostenible plantiaus ta 2030.
Amás de l’obchetivo que ya emos comentau (“Guarenziar a disponibilidat d’augua y a suya chestión sostenible y o saniamiento ta toz”), i hai unatro que conzierne directamén a l’augua como recurso mundial esenzial cual chestión cudiadosa ye clau ta lo futuro: ye l’Obchetivo 14: “Conservar y utilizar sosteniblemén os ozianos, os mars y os recursos marinos.“
Pero no nomás ye ixo… l’augua ye en tot. Tamién se relaziona con mayor u menor intensidat con a luita contra a pobreza (Obchetivo 1) y a fambre (2), con a salut y o bienestar (3), con l’azeso a la enerchía asequible y no contaminán (6), con a produzión y consumo responsables (12), con l’azión por o clima (13) y por a vida d’os ecosistemas terrestres (15).
Propuestas ta o/a profesor/a
Iste tema ofrexe muitas posibilidaz por tener una vinculazión mui definida con a esperenzia diaria, con l’entorno, con costumbres de consumo y autituz cutianas. Ye fundamental conzenziar a l’alunno u alunna d’a importanzia de l’augua en as nuestras propias vidas, d’a responsabilidat en o buen uso, de poder aduyar a la sostenibilidat prenzipiando por un mesmo.
A ixo puede aduyar una selezión (adaptada a diferens edaz) de propuestas como as ofrexidas en a web Educazión 3.0 u en Canal Educa.
Deszendendo a l’entorno más zercano, se puede proponer un treballo conchunto sobre diferens aspeutos relazionaus con a Expo de 2008, dedicada a l’augua. Os zagals y zagalas no alzan memorias personals d’aquel evento (talmén ni sisquiera eban naxiu), pero pueden buscar informazión en Internet, tamién entre os suyos mayors (chicas entrevistas, cómo lo vivioron, qué memoria alzan, etz.), identificar o puesto en o cual se zelebró, qué infraestruturas y equipamientos quedan… En iste sentiu puede estar interesán conoxer as autividaz de l’Asoziazión Legau Expo, como entidat dedicada a clamar l’atenzión sobre o estau autual d’o rezinto, as posibilidaz de millora, u o suyo intrés en conservar o legau intelectual d’aquella esposizión, basau en os debates d’a Tribuna de l’Augua y en o Pabellón d’Iniziativas Ziudadanas (“O Faro”).
Tamién, con un carauter diacronico más acusau, propiziar investigazions sobre acontezimientos d’o pasau en os cuals l’augua chuga un papel fundamental. Se puede sucherir, por exemplo, una d’istas fitas:
- O bronze de Botorrita esponiu en o Museu de Zaragoza (documento churidico arredol d’un pleito por auguas).
- As feguras de Ramón de Pignatelli y Joaquín Costa.
- A oposizión a lo trescole de l’Ebro en o dezenio de 1970 como reafirmazión d’una conzenzia aragonesa.
Entre tota a Educazión Secundaria, o currículo aragonés incorpora elementos relazionaus con o desembolique sostenible y o meyo ambién, asinas como a protezión debán d’emerchenzias y catastrofes, tenendo un d’os suyos prenzipios metodolochicos chenerals en a relazión con l’entorno sozial y natural y metendo azento en a educazión ta la salut y educazión ambiental.
Obchetivos que aduya a complir ista propuesta
ESO:
- Avaluar criticamén os costumbres sozials relazionaus con a salut, o consumo, o cudiau d’os seres vivos y o meyo ambién, contribuyindo a la suya conservazión y millora.
- Desarrollar destrezas basicas en a utilizazión d’as fuens d’informazión ta, con sentiu critico, alquirir nuevas conoixenzias.
Bachillerato:
- Conoxer y avaluar criticamén as realidaz d’o mundo contemporanio, os suyos antezedens istoricos y os prenzipals factors d’a suya evoluzión. Partizipar de forma solidaria en o desembolique y millora d’o suyo entorno sozial
- Conoxer y avaluar de forma critica a contribuzión d’a zenzia y a tecnolochía en o cambio d’as condizions de vida, asinas como afianzar a sensibilidat y o respeto ta lo meyo ambién.
Materias con as cualas puede vincular-se
- Biolochía y Cheolochía / Cheografía y Istoria / Avalúes eticos (ESO, 1er y 2º ziclos)
- Economía (ESO, 2º ziclo)
- Bachillerato: A asignar en funzión de modalidat. Por exemplo, Zenzias d”a Tierra y o Meyo Ambién, tamién Cheografía, Istoria…
Desembolique de competenzias
- Competenzias sozials y zivicas