Esta entrada también está disponible en: Aragonés Català Español Français English
SON LOCOS ISTOS RUNNERS
A yo correr me pareixe d’idiotas. Ta dó corre ixa chen? Pierden l’autobús toz os días a la mesma ora con as suyas muchilas minusclas? Plegan tarde ta l’aeropuerto? U ye que se pierden a suya serie favorita?
Ixa chen que corre, Dios sabrá ta dó, no debe saber que esiste Netflix. Si corren porque se pierden a suya serie favorita (os mui boomers…), cal esplicar-les que le puez dar a reproduzir cuan quieras y, si no, cal esplicar-les que unatra opzión ye estar tirau en o sofá minchando chicolate y palomitas (en l’orden que cadagún quiera u mezclaus a lo loco, tu dixa-te levar).
No, no. Para, no me sueltes o rollo de siempre, que sí, que sí. Lo de a salut, vivir más años, vivir millor, me lo sé tot y sigo pensando que pon supera a ixa sensazión de cuan acaba un capitulo emozionantismo y no nomás puez veyer o siguién, sino que amás descubres que agún te quedan palomitas en o bol: a felizidat plena.
Tot y con os míos esfuerzos por desanimar-la, a mía millor amiga ha empezau a fer esporte y agora no i hai qui la aguante. A cualsequier cosa que le digo, me diz que ixo s’apaña fendo esporte. Yo digo “me duelen as camas” y ella “pus empeza a correr”. Yo: “Pus ye que no sé qué fer ista tarde”, ella: “Si estases apuntada a bel esporte, podrías ir a practicar-lo”. Yo: “Soi nerviosa y preocupada”, ella: “Nos imos a escalar y asinas t’aireyas un poquet?”.
Pero dende cuán o esporte s’han convertiu en a soluzión a toz os problemas d’o mundo: apaña as dolors, a marguinazión sozial, as enfermedaz cardiovasculars, aduya a la sostenibilidat y denzima as series te duran más porque no tiens tiempo de fer-te maratons de tardes enteras (has de pasar-te por o club os martes y os chueves).
Cosiro os tiempos en os cuals toz (u nomás yera yo?) pensabanos que o esporte yera un rollo y que os que correban yeran locos. Sobre tot, porque, con tanta insistenzia, a la fin he abiu d’apuntar-me a un d’os mil esportes que me proponeba a mía amiga y he delgazau, me duelen menos as camas, he feito un muntón d’amigos, he viacheau grazias a las salidas con o club y me siento más autiva que nunca.
Ixa capulla m’ha apañau a vida. Quí le manda a ella millorar-me a existenzia? Y de qué fablo yo ara entre tot o día si no me puedo quejar d’as dolors, de l’aborrimiento, d’a marguinazión y de lo fatos que son os que se van a correr? Como digas d’esporte, te mato.
A la fin abrá d’estar un dreito fundamental, cómo que ya lo ye? A veyer que m’entere yo bien más abaixo…
Descripzión
O esporte y l’autividat fisica son un dreito fundamental y una poderosa ferramienta ta fortalexer os lazos sozials y promover o desembolique sostenible y a paz, asinas como a solidaridat y o respeto por toz. Iste Día permite reconoxer ixe papel positivo en as comunidaz y en a vida d’as personas.
En ixe sentiu, o esporte aduya a cambiar o mundo. Ye un potén veiclo ta la inclusión sozial, a igualdat de chenero y a capazitazión d’os chovens. As valors que s’alquieren a traviés d’o esporte (como o chuego limpio y o esprito d’equipo) tiene una valor incalculable ta la soziedat.
Dende a instaurazión en 2013 d’iste Día Internazional, a ONU convida a los Estaus, a las organizazions esportivas internazionals, rechionals y nazionals, a la soziedat zivil, incluyidas as organizazions no gubernamentals y o sector privau, y a toz os interesaus a que partizipen en a zelebrazión y aduyen a ixa presa de conzenzia.
Más informazión
Os obchetivos y contenius d’ista propuesta pueden estar relazionaus con os esponius en o Día Internazional d’a Paz (21 de setiembre); tamién pueden estar vinculaus con o Día Europeu d’o Esporte Escolar (26 de setiembre).
En Aragón…
A Lei 16/2018, de 4 d’aviento, de l’autividat fisica y o esporte d’Aragón esplica en o suyo articlo 2 que toz os ziudadans en Aragón tienen dreito “a la practica de l’autividat fisica y o esporte de forma voluntaria y a asoziar-se libremén ta l’exerzizio d’iste dreito”. Por ixo, as alministrazions publicas aragonesas han de fazilitar “a toz os ziudadans l’exerzizio d’o dreito a prauticar esporte y autividat fisica, ya siga con fins d’ozio, salut, bienestar, millora d’a condizión fisica, u d’o rendimiento y d’a competizión”, guarenziando que ixa practica se realize en igualdat de condizions y d’oportunidaz.
En a portalada web d’a Direzión Cheneral d’Esportes d’o Gubierno d”Aragón i hai muita informazión sobre normativas, campañas, iniziativas, notizias, recomendazions… S’informa tamién sobre o Plan Estratechico Aragonés d’o Esporte. Esiste tamién una completa portalada web arredol d’os chuegos y esportes escolars en Aragón.
Dos detalles
O tema d’iste Día Internazional en 2023 ye “Marcar tantos por as personas y a planeta”. Como en años anteriors, propone autividaz zentradas en l’impauto y a influenzia d’o esporte en o desembolique sostenible y a paz. O esporte tiene o poder de cambiar o mundo. Naziones Unidas lo emplega como ferramienta ta unir a individuos y grupos por meyo d’o refirme a os esfuerzos de l’esporte ta o desembolicamiento, a partizipazión en eventos tanto a libel mundial como de base, y o desembolique d’as suyas propias campañas y iniziativas relazionadas con o esporte.
O esporte ye un elemento transversal en a consecuzión d’os Obchetivos de Desembolique Sostenible ta 2030. A Plataforma ta lo Esporte, o Desembolique y a Paz ye una iniziativa dedicada a lo esporte como estratechia de desembolique sozial en Iberoamérica. En o suyo web s’esplica de qué forma aduya a complir de forma más dreita os siguiens obchetivos:
- Fin d’a pobreza (1)
- Salut y bienestar (3)
- Educazión de calidat (4)
- Igualdat de chenero (5)
- Treballo dezén y creximiento economico (8)
- Ziudaz y comunidaz sostenibles (11)
- Paz, chustizia y instituzions solidas (16)
- Alianzas ta conseguir os obchetivos (17).
Puede trobar-se mayor detalle y datos más concretos en o esporte en a consecuzión d’os Obchetivos de Desembolique Sostenible.
Una reflesión
O esporte mostra valors como a equidat, o treballo en equipo, a igualdat, a disziplina, a inclusión, a perseveranzia y o respeto. Asinas se manifiesta Nazions Unidas en relazión con o esprito olimpico.
En a devantadera d’os pasaus Chuegos de Tokio, o secretario cheneral d’a ONU, António Guterres, dizió que “o esprito olimpico saca lo millor d’a umanidat: treballo en equipo y solidaridat, taliento, toleranzia… nos inspira y nos unifica en tiempos difizils (…). Si toz aplicasenos ixa mesma enerchía a los nuestros desafíos globals, podríanos adubir cualsequier cosa: a paz; una planeta limpia, verda y próspero; y un mundo millor y más equitativo”.
Os Chuegos Olímpicos y Paralimpicos como momento de tregua en os conflictos (se cumple?) y como ocasión de visibilidat de países y culturas.
Propuestas ta o/a profesor/a
Os contenius fazilitaus nos dan idea de lo transversal que ye o esporte, l’autividat fisica, os costumbres saludables y os elementos de convivenzia que chenera en torno suyo. Ixo da una oportunidat ta reflesionar en l’aula, y mesmo debatir y cuestionar cualques d’ixos aspeutos en a suya confrontanza con o día a día.
Amás d’ideas que puedan desprender-se de cualques d’as referenzias dadas, sucherimos, por exemplo, a lectura y mesa en comuna arredol de l’articlo “O partiu de futbol que paró a guerra” (epe.es). Aneudotico? (a la fin y a lo cabo, dimpués tornoron a matar-se entre els).
Tamién se pueden plantiar cuestions más “personals” como “Cuál ye o tuyo esporte favorito y por qué?”, u atras que permitan l”intercambio y o dialogo: “O esfuerzo individual y o treballo en equipo: qué consideras que ye más importán, en o esporte y en a vida? Crees que ye paradoxal fablar d’as valors inclusivas d’o esporte y d’a superazión de retos personals, por una parte, y por unatra, privilechiar lo competitivo, a moral de trunfo y a supremazía?”
En ixe sentiu, puede proposar-se o visionau de dos zintas que meten imachen a dos aspeutos contradictorios (más bien en as antipodas) en relazión con o esprito olimpico: as zintas Carros de Fuego (1981, Hugh Hudson, con a inconfundible banda sonora de Vangelis) y Olympia (Leni Riefesthal, 1938).
Elementos transversals
O currículo aragonés preveye “midas ta que l’autividat fisica y a dieta equilibrada formen parte d’o comportamiento chuvenil. A istos efeutos, se promoverá a prautica diaria d’esporte y exerzizio fisico por parte d’os alumnos entre a chornada escolar, en os termins y condizions que, seguindo as recomendazions d’os organismos competens, guarenzien un desembolique adecuau ta afavorir una vida autiva, saludable y autonoma”.
Con espezial atenzión a la intelichenzia emozional como prenzipio metodolochico, “ha de promover-se un clima d’aula y de zentro que afavoreixca l’equilibrio personal y unas relazions personals basadas en as valors fundamentals de convivenzia”, inzidindo que “l’autividat mental y l’autividat fisica d’os alumnos s’enriqueixen mutuamén” y que “a motricidad ha d’estar atendida como meyo y como fin”.
Obchetivos que aduya a complir ista proposa
ESO:
- Asumir responsablemén os suyos debers, conoxer y exerzer os suyos dreitos en o respeto a os de demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra a muller.
- Conoxer y azeutar o funzionamiento d’o propio cuerpo y lo d’os atros, respetar as diferenzias, afianzar os costumbres de cudiau y salut corporals y incorporar a educazión fisica y a prautica d’o esporte ta afavorir o desembolique personal y sozial. Conoxer y avaluar a dimensión umana d’a sexualidat en tota a suya diversidat. Avaluar criticamén os costumbres sozials relazionaus con a salut, o consumo, o cudiau d’os seres vivos y o meyo ambién, contribuyindo a la suya conservazión y millora.
Bachillerato:
- Exerzer a ziudadanía democratica, dende una perspeutiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Utilizar a educazión fisica y o esporte ta afavorir o desembolique personal y sozial.
Materias con as cualas puede vincular-se
- Educazión Fisica / Valors eticas (ESO, 1er ziclo)
- Educazión Fisica / Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas