Esta entrada también está disponible en: Aragonés Català Español Français English
MEMORIA EMPLATADA
Qué morro le chita o mío novio. No para de dezir que él d’o que pasó fa un año ya no s’alcuerda. No se refiere a pon en concreto, lo diz en cheneral. Ocurre un evento X, dimpués empezan a pasar os días y, cuan plegan a 360, s’acabó. Se le olbida.
A lo prenzipio me feba grazia, nos redibanos chuntos: que le den a lo pasau! Vivamos o presén! Pero l’atro día pasó una cosa que m’ha feito replantiar-me-lo tot: Va o tío y dixa de fregar os platos cuan le toca.
A lo prenzipio me lo prenié como una cosa inozén, seguro que va liau, pensé. Y los fregué yo sin más, pero pasoron os días y o tema se repetiba. Día dezaga de día. Una y atra vez. Cuan comprebé que en ocasions se quedaba tirau en o sofá, me die cuenta que no yera una temporada de muito enredo ni pon por o estilo. Asinas que fazié lo unico que podeba fer: dixé de fregar-los yo tamién.
A lo cabo de 15 días, cuan ya feba tres que yeranos minchando en platos desechables, a mía vezina pasó convenzida que aquella olor orrible significaba que nos iba a trobar calabre a los dos en o suelo d’o salón. La tranquilizé: “Nomás ye una guerra de platos”.
Le mostré a cozina ta que no clamase a la polizía. Tasamén s’esferenziaba a enzimera dezaga d’a pila de platos que empezaba a salir por a puerta ta lo corredor. Ara me doi cuenta que m’entivoqué, porque luen de relaxar-se, salió chilando que iba a clamar a sanidat, a l’alcalde y a lo Trebunal Superior de Chustizia si feba falta. Si creyes que exacheraba, ye porque no has visto cómo yera aquella cozina.
Movida por a perspectiva que se plantasen os GEOS en a mía casa ta frenar aquella locura, me dezidié a fablar con o mío novio que ni curto ni prezoso me respondió que qué sabeba él que calese fregar os platos. Le refresqué a memoria:
-No t’alcuerdas d’aquel broncón que teniemos cuan nos fuemos a vivir chuntos?
-Ui, ye que d’ixo fa más d’un año, no? Pon, ya no m’alcuerdo.
Vale, talmén o poco-punto d’o mío novio lo fa aldredes ta no fregar, pero me fazió plantiar-me bella cosa interesán: Si no t’alcuerdas d’a que se lio aquella vez que intentés, no sé, por exemplo, apañar a tuyo bizi sin aduya, anque no teneses ni idea u apañar a vida amorosa d’a tuya amiga sin conoxer tota a istoria. Cómo vas a evitar tornar a liar-la parda? Y astí sí que veyié a importanzia d”ixo que claman memoria democratica.
Tu qué opinas? Te pareixe importán recordar o que pasó en Alcañiz o 3 de marzo de 1938 ta fer tot lo posible porque no se repita? Sabes o que pasó? Sigue leyendo ta enterar-te.
Descripzión
O 3 de marzo ye instituyiu como Día d’a Memoria Democratica d’Aragón. Ye una chornada ta recordar que o estau democratico en o cual uei vivimos debe muito a personas que arriscoron as suyas vidas por as libertaz, en un marco de dictadura y de represión. Tamién suposa una reconoixenzia a las vidas inozens segadas en conflictos como a guerra zivil de 1936-1939.
Prezisamén como reconoixenzia a istas zagueras se plantió ista Chornada. Una calendata que, en él mesma, supone un exerzizio de reparazión.
O detalle
O 3 de marzo de 1938, debán d’a imminén ruptura d’o fren d’Aragón, l’aviazión italiana que apoyaba a l’exerzito sublevau contra a Republica bombardió a ziudat d’Alcañiz, sembrando a terror entre a poblazión zivil y ocasionando zentenars de victimas entre a mesma. Un suzeso silenziau entre dezenios que ha recuperau o suyo puesto en a Istoria.
Os obchetivos y contenius d’ista propuesta pueden estar relazionaus con a vinculada a lo Día Internazional en Memoria d’as Victimas de l’Holocausto y Prevenzión de Crimens contra a Umanidat (27 de chinero).
A memoria democratica, en lei
A Lei 14/2018 de 8 de noviembre, de Memoria Democratica d’Aragón, diz en o suyo preámbulo:
Más de tres dezenios d’exerzizio democratico y d’autonomía en Aragón han asentau una cultura politica pro tolerán y ubierta como ta abordar de manera serena y matura a relazión con o pasau traumatico vinculau a la guerra zivil y a dictadura franquista. Construyir a memoria democratica a partir d’a memoria d’ixe pasau y d’a más rigorosa conoixenzia istorica ye o modo más firme d’alimentar a nuestra democrazia d’os prenzipios eticos y morals que la fortalexerán fren a los discursos d’a exclusión y a intoleranzia, d’asegurar en definitiva o nuestro futuro de convivenzia y paz.
Ye impreszindible, en ixe sentiu, recordar y omenachear as vidas y as esperenzias d’aquellas personas que s’esforzoron por conseguir y defender en Aragón un rechimen democratico como lo d’a Segunda Republica española, a qui sofrioron as consecuenzias d’a guerra zivil, a las cualas padexioron castigo, persecuzión u muerte inchustos a mans d’a dictadura franquista por oponer-se a la mesma u estar sospeitosas d’ixo, u por defender a democrazia y a libertat.
Una reflesión
A regulazión y normalizazión d’a memoria, a suya chestión publica y a suya inclusión en l’ambito escolar testimonian una madurez ta afrontar o pasau con as suyas uembras, y ta asentar unas bases de “libertat de pensamiento” fren a “pensamiento unico”.
Puestos de memoria
A Lei 3/1999 de 10 de marzo, d’o Patrimonio Cultural Aragonés, estableix una amplia tipolochía de biens d’intrés cultural (BIC), inventariaus y merexedors de diferens feguras de protezión, entre os cuals se troban os conchuntos d’intrés cultural. A istos espazios (conchunto istorico, chardín istorico, puesto istorico, zona paleontológica, zona arqueolochica, puesto d’intrés etnográfico) s’han sumau os Puestos de memoria democratica. Son espazios, construzions u elementos inmuebles cual significau istorico ye releván (seguntes a Lei 14/2018 de Memoria Democratica d’Aragón) “ta la explicazión d’o pasau d’Aragón en termins de partizipazión, defensa y luita a favor d’a democrazia fren a la intoleranzia y a dictadura en o marco istorico d’a Segunda Republica española, a guerra zivil y a dictadura franquista”.
Web Patrimonio Cultural d”Aragón
Sucherenzias de consulta / Proposadas ta o/a profesor/a
Constatau o escaso tratamiento que s’ha veniu dando en as asignaturas de zenzias sozials (espezialmén en ESO) a la istoria d’España y d’Aragón en o sieglo XX (muitas vezes por estar programadas ta finals de curso, cuan de forma más aprezisada s’afruentan os contenius), puede estar util estriar dentradas proposadas como as siguiens:
Por lo que fa a demandas d’encorporazión de contenius de memoria democratica a lo currículo, o profesor u profesora puede situar-se en contesto a traviés d’informazions como: O Gubierno se propone emplir os foraus educativos sobre a dictadura y a luita antifranquista (notizia en eldiario.es, 21 de chulio de 2021), u Memoria istorica en as aulas: asignatura pendién d’a educazión en España (notizia en eldiario.es, 17 de chunio de 2018).
Se puede prener tamién bella informazión a partir de contenius como os servius por asoziazions memorialistas, como Asoziazión ta la Recuperazión d’a Memoria Istorica d’Aragón.Una entrevista a l’istoriador Julián Casanova en o Diario de Teruel (“O bombardeyo d’Alcañiz va dillá de l’ambito local”, 4 de marzo de 2022) aporta pro luz sobre iste asunto y mete o foco, prezisamén, sobre l’orichen d’a calendata eslechida como Día d’a Memoria Democratica d’Aragón.
Unatra sucherenzia, que amás nos conectar con atras valors, presa como punto de partida una notizia de chinero de 2022 sobre a declarazión d’a fuesa de María Domínguez en Fuendejalón como Puesto de Memoria Democratica. Nos conectar con a biografía de María Domínguez, a primera alcaldesa democratica d’España, entre a Segunda Republica, cual vida ye un exemplo de superazión. En a web “40 aragoneses ilustres” d’o Gubierno d’Aragón puede esplorar-se sobre a suya vida, apreziando tamién diferens propuestas didauticas, recursos d’investigazión senzilla y analisi. Tamién ye posible relazionar-la con cualques aspeutos d’o Estatuto d’Autonomía (en concreto, o dreito a la partizipazión ziudadana en a cosa publica).
En ixa mesma web, tamién puede apreziar-se a fegura de Ramón Acín.
Por lo que fa a la luita antifranquista en Aragón, i hai moltetut de treballos en Aragón sobre diferens aspeutos (guerrilla, movimiento obrero, vecinal y estudiantil, autonomismo, etc.). Por estriar un caso mui concreto, recomendamos a consulta de materials como Islas de libertat, de Pablo Marín: un treballo academico d’investigazión sobre o movimiento estudiantil antifranquista en Aragón (aloxau en o repositorio d’a Universidat de Zaragoza) que puede dar a dozén cualques pistas… propiziar dialogo, columbradas…
A partir de totas istas premisas, puede desarrollar-se una serie d’autividat endrezadas a l’alunnau: explorazión sobre bella d’as pachinas referenziadas, plantiamiento d’un senzillo cuestionario ta calibrar a comprensión de contenius, busqueda d’informazión sobre cualques cuestions esgranadas, explorazión sobre esperenzias u memorias arredol de l’asunto en o marco familiar, intercambio d’ideas y opinions, composizión de testos…
Elementos transversals
En o currículo aragonés de Secundaria s’estableix o fomento de l’aprendizache d’a prevenzión y resoluzión pazifica de conflictos en toz os ambitos d’a vida personal, familiar y sozial, asinas como d’as valors que sustienen a libertat, a chustizia, a igualdat, o pluralismo politico, a paz, a democrazia, o respeto a los dreitos umanos y o refuso a la violenzia terrorista, a pluralidat, o respeto a lo Estau de dreito, o respeto y considerazión a las victimas d’o terrorismo y a prevenzión d’o terrorismo y de cualsequier tipo de violenzia. Asinasmesmo, “se promoverán y difundirán os dreitos d’os ninos en l’ambito educativo. Tal como se replega en a Lei 52/2007, de 26 d’aviento, por a cuala se reconoxen y amplan dreitos y s’estableixen midas en favor de qui padexioron persecuzión y violenzia entre a guerra zivil y a dictadura se fomentarán as valors constituzionals y se promoverá a conoixenzia y a reflesión sobre o nuestro pasau ta evitar que se repitan situazions d’intoleranzia y violazión de dreitos umanos como as alavez vividas. A programazión dozén ha de comprender en tot caso a prevenzión d’a violenzia de chenero, d’a violenzia terrorista y de cualsequier forma de violenzia, razismo u xenofobia, incluyiu o estudio de l’Holocausto chodigo como feito istorico”.
Obchetivos que aduya a complir ista proposa
ESO:
- Asumir responsablemén os suyos debers, conoxer y exerzer os suyos dreitos en o respeto a os de demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra a muller.
Bachillerato:
- Exerzer a ziudadanía democratica, dende una perspeutiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Consolidar una madurez personal y sozial que les permita autuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra a muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
Materias con as cualas puede vincular-se
- Cheografía y Istoria / Avalúes eticos (ESO, 1er y 2º ziclos)
- Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas