Esta entrada también está disponible en: Aragonés Català Español Français English
BENDITA PELLA
A mía mai me mete d’os niervos con o temeta d’a mincha. Te pasa a tu tamién? Prenzipia: “No has minchau pon”. Si un día tiengo muita fambre y como más de lo normal, diz: “No será muita cantidat?”. Mama mía. Qué pesada. No ye contenta nunca. Se fixa tanto en o que mincho que a vezes me cuacaría amostrar-le a chugar a la Play ta que se distrayese y me dixase en paz. Luego pienso que me vendría tot o rato con bella pregunta de cómo se fa isto u lo unatro y me doi cuenta que tampó no ye buena idea.
Dimpués ye lo de insistir que he de minchar o que no me cuaca. No me mola la pella. Ya ye. Me pareixe fastiosa. A color ye fiera, sabe malamén, no fa buena olor, en serio, ye a umanidat segura que a naturaleza creó a pella ta que nos la minchasenos? Ixo l’ha comprebau belún?
Caminaba ayer de camino a lo parque, pensando en a quí abrían mandau a comprebar si a pella yera realmén feita ta minchar u no, cuan veyié a un compañero de clase en un edifizio en o cual no m’eba fixau nunca. Yera fendo coda y m’azerqué a saludar-le. M’extrañó muito porque me dio a impresión de que yera finchindo que no m’eba visto. Se metió tot royo y dentró en l’edifizio aprisa.
En plegar a lo parque, do eba quedau con atros amigos, les pregunté qué yera ixo. —O banco d’alimentos— me dizioron. Y comprendié que o mío amigo eba iu allí con a suya familia a por comida y no le eba cuacau que lo veyese.
Se m’ocurre que, si quiere, yo podría dar-le a pella que me toque, no? Seguro que podríanos dar-le más cosas. No me va muito o tomate, ixo tamién se lo podríanos dar.
Bueno, yo creigo que podemos compartir-lo tot. Cualsequier alimento, o que a él más le cuaque. Fixa-te que, si fa falta, comparto dica as trunfas fritas y, pro, le dixo a mía Play y os míos libros cuan quiera. A fin de cuentas, él siempre m’aduya con cosas de mates.
Sabes qué? De sopetón, me siento mui afortunada de tener Play con a cuala chugar, libros, trunfas fritas y dica pella y m’encantaría saber qué fer con as cosas que puedo compartir con atros que pertenexcan a una familia que tienga menos diners que a mía.
Voi a seguir leyendo ta saber si en Aragón i hai más personas como o mío amigo y qué puedo fer yo ta chitar-les una mano.
Descripzión
O 17 d’otubre de 1987, más de zien mil personas s’achuntoron en a plaza d’as Libertaz y d’os Dreitos Umanos en o Trocadero (París) en omenache a las victimas d’a fambre, a ignoranzia y a violenzia, baixo un mandau mui claro: a existenzia de pobreza atenta contra os dreitos umanos.
D’aquella trobada quedó una placa commemorativa d’o compromiso en a luita contra a pobreza, d’a cuala s’han feito replicas en muitas partes d’o mundo, y arredol d’as cualas, dende alavez y en ixa calendata, se vienen reunindo personas de tota condizión y creenzia.
Una d’ixas placas ye en o chardín d’a seu de Nazions Unidas en Nueva York. En a suya resoluzión 47/196, a suya Asambleya Cheneral convidó a os estaus miembros y a atras organizazions a que dediquen o 17 d’octubre a promover autividaz concretas que faigan visible a realidat d’a pobreza y a luita contra ella.
Más informazión
En a pachina web de Nazions Unidas, Día Internazional ta la Erradicazión d’a Pobreza, 17 d’otubre.
Informes Oxfam en relazión con a pobreza.
As valors desprendidas en ista propuesta son aplicables a la memoria plantiada en atros recordatorios, como: Día Mundial d’a Fambre (28 de mayo), Día Mundial de l’Alimentazión (16 d’octubre). Tamién se relaziona con o Día Internazional d’o Migrán (18 d’aviento).
En Aragón…
Fablamos de países ricos y pobres, de Primer y Terzer Mundo, de países desarrollaus y subdesarrollaus (a os cuals, como eufemismo, se les clama a vezes “países en desembolique”). A pobreza en un fenomeno global: entre os 17 Obchetivos de Desembolique Sostenible de l’Achenda 2030 d’a ONU, l’Obchetivo 1 ye “Fin d’a Pobreza” (l’Obchetivo 2 ye “Fambre Zero”).
Ixas imachens de grans ziudaz africanas u latinoamericanas con enormes suburbios de chabolas y infraviviendas, con a cruel realidat que reflexan, no han de fer-nos olbidar que “en casa” tamién i hai muita pobreza.
A pobreza ye bella cosa cutiana, dolorosamén presén en o nuestro entorno, tot y que en teoría formemos parte d’ixe privilechiau primer mundo. En os zaguers años s’ha agravau a causa d’a pandemia motivada por a Covid-19 y a guerra d’Ucraína. As consecuenzias economicas d’istos acontezimientos son evidens, y os grupos más vulnerables d’a soziedat, personas dependiens, treballadors con emplegos más precarios u en seutors más afectaus por a crisi, etz., corren o risque de cayer baixo o branquil d’a pobreza.
Ye interesán conoxer iniziativas que suman conzienziazión en a ziudadanía y voluntat de contribuyir a paliar o problema. Por exemplo, a Fundazión Banco d’Alimentos de Zaragoza. Istas y atras iniziativas, emprendidas dende lo urchén han d’estar complementarias d’atras azions más estructurals a cargo d’os poders publicos, os achens sozials, etz.
Cualques reflesions
A pobreza ye un fenomeno con muitos matizes.
Tanto en lo global como en lo local, a pobreza ye filla d’a desigualdat y d’a inchusta distribuzión de biens. En un mundo como lo nuestro, con un libel altismo de desembolique economico y teunolochico, con abundans recursos… ye inazeptable que millons de personas vivan sin lo nezesario ta vivir con dignidat.
A pobreza no ye un problema de falta d’ingresos. As personas que viven en a pobreza esperimentan condizions que van interrelazionadas, que se reforzan mutuamén y que perpetuan a suya situazión de desventalla: malas condizions de treballo / vivienda insegura y inefizién / carenzia alimentaria / azeso insufizién a la educazión, a la sanidat y a la chustizia…
Vesita a web de Nazions Unidas sobre l’Achenda 2030 ta lo Desembolique Sostenible. Entre os 17 Obchetivos de Desembolique Sostenible, l’Obchetivo 1 ye “Fin d’a Pobreza” (meter fin a la pobreza en totas as suyas formas en tot o mundo). L’Obchetivo 2 ye “Fambre Zero”.
Un detalle
I hai qui sustiene que qui ye pobre ye porque no s’ha esforzau en dixar d’estar-lo (en estudiar más, en buscar oportunidaz, en “emprender”, etz.). O esfuerzo personal se vende (cheneralmén por os trunfadors) como camino infalible ta lo esito, olbidando que “estar competitivo” implica dixar en o camino a atros que tamién pueden estar esforzando-se.
Ye bueno avaluar y potenziar o treballo, o esfuerzo y a voluntat, pero no vulcar-lo tot en as marabillas de le meritocrazia. Puede estar interesán leyer iste articlo sobre “o mito d’o esfuerzo y as trapas d’a pobreza”.
Prezisamén, o que nos ha mostrau (y nos sigue mostrando) a realidat d’os zaguers tiempos, ye que a inseguridat ye aguaitando: que una posizión solida asentada en muitos años d’esfuerzo y treballo puede venir-se abaixo. Que a pobreza ye cosa de toz, que a pobreza no nomás ye mendizidat, que i hai treballadors pobres, que i hai pobreza enerchetica, que i hai pobreza invisible. A realidat autual nos diz que, en linias chenerals y debán d’a puyada absurda de pres, a mayoría somos más pobres porque tenemos menos poder alquisitivo que fa un año. Sin que isto empavone realidaz muito más crudas… abría de fer-nos reflesionar.
Propuestas ta o/a profesor/a
Tot y con aber estau rodada fa más de sisanta años, a zinta Plácido, de Luis García Berlanga (1961) nos evoca temas d’autualidat.
Por si ye poco viable o visionau completo, amostramos aquí dos fragmentos:
Sería interesán un breu intercambio de parezers sobre o que se conta en ixos fragmentos.
Amás, a informazión ofrexida en iste capitulo puede dar piet a:
- Senzillos treballos relazionaus con as conclusions d’informes (como lo de Cáritas Aragón) u con o tratamiento d’a luita contra la pobreza en a web de l’Achenda 2030 d’a ONU.
- Debate arredol d’articlos como o zitau: “O mito d’o esfuerzo y as trapas d’a pobreza” Seguramén, y ye lechitimo que asinas siga, puede aber opinions diverchens sobre cualques d’as ideas que treslada. Sin dixar de costau esbaruquías que puedan chenerar contraversia… i hai moltetut d’informes y articlos que aquí ye imposible detallar arredol d’as desigualdaz creixens (“os ricos cada vez más ricos… os pobres cada vez más pobres”, con perzentaches d’o tipo “o 1% más rico poseye tanto más que o 50% más pobre”), notizias sobre fichas milmillonarias de futbolaires, etz.
- Proposar busqueda d’informazión y documentazión sobre ideas y conzeptos como “Estau de bienestar”, “ingreso minimo vital”, “pobreza enerchetica”, “codas d’a fambre” y atros que puedan surtir.
A realidat de cada aula, l’entorno sozioeconomico en o cual s’insere cada zentro… tienen muito peso a la ora de dezidir autividaz. Sin dudar d’o buen criterio de cada dozén, se recomienda amostrar empatía y delicadeza debán de situazions de precariedat que os propios alumnos y alumnas pueden vivir en as suyas casas. Un tema tan delicau como este, en a mida en que ye tan presén en o nuestro entorno exiche que nos alexemos de visions apocalípticas (“ta dó va iste mundo”) como trivializadoras (observar a pobreza como bella cosa que, en cheneral, no nos plega a conzernir d’o tot, porque en a mayoría d’os casos tenemos as nuestras nezesidaz cubiertas), y inzidir que una parte importán d’a soluzión a lo problema d’a pobreza radica (entre muitas atras cosas) en uns servizios publicos de calidat, en una educazión a l’alcanz de toz.
Obchetivos que aduyan a complir ista propuesta
ESO:
- Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra a muller.
Bachillerato:
- Exerzer a ziudadanía democratica, dende una perspeutiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
- Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra la muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.
Materias con as cualas puede vincular-se
- Cheografía y Istoria / Avalúes eticos (ESO, 1er y 2º ziclos)
- Educazión ta la ziudadanía y os dreitos umanos / Economía (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas