Esta entrada también está disponible en: Aragonés Català Español Français English
NUEIS EN BLANCO
Te prexinas que as obras d’arte charrasen un rato dimpués d’o treballo? Te propongo un chuego. Iste ye un dialogo entre obras d’arte de museus de Zaragoza, pero yes tu o que ha de meter-le nombre a los personaches, qué obras d’arte podrían estar charrando aquí?
– (1): Tanto turista me ye matando. Amenesto vacanzias.
– (2): A lo menos tu yes dezaga d’una vitrina y no te tocan o culo fugazmén cuan creyen que dengún se da cuenta.
– (1): Ye o que tenez as avanguardias, que dan ganas de tocar. Ya te digo que a ista no a toca dengún.
– (3): Siente, que yo no tiengo a culpa d’estar una latrina. Amás, un respeto a las canas, que tiengo más de 2000 años.
– (4): Se puede?
– (2): Pansa, gravau.
– (4): Bien se vale que ez proponiu lo de l’aftework , yo soi agotau ya y agún no ha empezau a temporada.
– (3): En os míos tiempos dengún deziba parolas raras ta quedar dimpués d’o treballo.
– (4): En os tuyos tiempos tampoco esistiba a televisión y d’ixo no te quexas.
– (3): Qué subiditos tos metez os de Goya…
– (1): I aiga paz, que nos van a pillar afora d”os nuestros puestos si fablaz tan alto.
– (4): Ez sentiu ixo que cada vez i hai menos chen que nos vesita?
-(2): Sí, ye una pena, tenemos unas istorias aluzinans que contar. Yo dinantes yera una bailarina.
-(3): Yo he teniu sobre yo a grans personalidaz istoricas.
– (1): La de culos ilustres que han pasau por o tuyo forau!
1, 2 y 4 RIDEN A CARCALLADAS
– (3): Imbezils…
– (2): No te vaigas, latrina!
-(4): A verdat ye que sí tiene unas istorias aluzinans… Sabez que en a sala do yera i eba 29 latrinas y a chen feba as suyas cosas astí toz chuntos?
– (1): U siga, que ye una istoria de mierda.
TORNAN A REDIR
– (2): No sigamos por astí, que s’ha enuyau y pareixe que no torna. Venga, le digo que nos lo conte, a veyer si aprendemos bella cosa y femos as pazes.
– (1): A veyer si consegues que torne y cadagún contamos a nuestra istoria.
A eszena ye pensada como una conversazión entre cuatre obras d’arte: qué obras espezificas son fablando? En cualques casos i hai muitas obras posibles y en atros o dialogo te diz esautamén quí fabla. Te toca investigar!
Tu creyes que os museus pueden cambiar o mundo? Chita un gollada a la nuestra reflesión más abaixo.
Descripzión
O Día Internazional d’os Museus ye un evento coordinau por o Consello Internazional de Museus (ICOM). As zelebrazions tamién s’extienden a los días anteriors y posteriors. Ye una ocasión ta ubrir os museus a lo publico, y sensibilizar-lo sobre a importanzia capital d’istos equipamientos.
O museu ye una instituzión a lo servizio d’a soziedat: alquiere, conserva, investiga, exibe y transmite o patrimonio material y inmaterial d’a umanidat y o suyo meyo ambién con fins educativas, d’estudio… y tamién d’entretenimiento y espleitamiento.
Os museus contribuyen de manera prenzipal a o bienestar y a o desembolique sostenible d’as nuestras comunidaz. As autividaz asoziadas a iste Día Internazional en 2023 son mui relazionadas con l’Obchetivo de Desarrollo Sostenible “Salut y bienestar”.
Más informazión
- En a pachina web d’o Consello Internazional de Museus (ICOM)
- Web espezifica d’iste Día Internazional
Os contenius y obchetivos d’ista propuesta meter-se en relazión con a zelebrazión d”o Día Internazional d’a Educazión (24 de chinero).
En Aragón…
A nuestra comunidat autonoma cuenta con un magnifico ret de museus, con una gran variedat de tematicas. Nos trobamos con museus arqueolochicos, de bellas artes, d’arte contemporanio, d’etnolochía y antropolochía, de paleontolochía, de zenzias naturals; museus chenerals y museus espezializaus; museus publicos dependiens de distintas alministrazions y museus privaus, chestionaus por particulars, por fundazions, por as diozesis eclesiasticas, ezetera. A mayor parte d’istos zentros forman parte d’o Sistema de Museus d’Aragón. Acullen colezions permanens y esposizions temporals; en muitos casos son dotaus d’interesans recursos interautivos y intuitivos y con ferramientas y propuestas didauticas cada vez más completas.
Os museus chestionaus por o Gubierno d”Aragón son o Museu de Uesca y o Museu Pedagochico d’Aragón, ambos en a capital oszense; o Museu Juan Cabré, en Calazeite (Teruel); y en Zaragoza, l”Instituto Aragonés d’Arte y Cultura Contemporanios (IAACC) Pablo Serrano y o Museu de Zaragoza, integrau por cuantas seus.
En cualques casos, amás d’o propio conteniu, intresa o “emborbozo”, por tratar-se d’edifizios con muita istoria y significau.
Un detalle
O Ret Dichital de Colezions de Museus d’España reune museus de distintas espezialidaz, de diversos ambitos tematicos y cheograficos, y de diferens titularidaz, publica y privada, con l’obchetivo de fer azesibles en linia contenius dichitals sobre as suyas colezions y creyar un espazio de difusión d”a conoixenzia sobre as mesmas. Cuantos museus aragoneses forman parte d’ixe ret, y as suyas colezions forman parte d’un gran catalogo colectivo en linia (CER.ES. Colezions en Ret).
Ixa ferramienta permite realizar busquedas chenerals y abanzadas en toz os museus u en una selezión realizada por l’usuario. Ye posible consultar en o catalogo de cadagún d’os museus u en una u cuantas agrupazions por tipolochía de museu, ubicazión cheografica, titularidat…
CER.ES Aragón publica más de 14.000 biens culturals perteneixiens a 23 museus. Ye prevista a progresiva encorporazión de nuevos contenius y nuevos museus, que enriquirán iste espazio de difusión d’a conoixenzia sobre as colezions a lo servizio de toz os usuarios que se quieran azercar a los museus d’Aragón a traviés d’o Ret.
Una reflesión
“O poder d’os museus” estió o lema d’a zelebrazión d’o Día d’os Museus en 2022. Os museus tienen o poder de transformar o mundo que nos rodeya. Como puestos incomparables d’escubrimiento, nos mostran o nuestro pasau y ubren as nuestras mentes a nuevas ideas, aduyando a construyir un futuro millor.
Dende l’ICOM se potenzia a idea d’o museu como refirme a la sostenibilidad: como achens clau en as suyas comunidaz locals, os museus contribuyen a muitos d’os Obchetivos de Desembolique Sostenible de Nazions Unidas ta 2030, en incluyir aspeutos relazionaus con a economía sozial y con a difusión d’informazión zientifica sobre os retos meyoambientals). Amás, tamién influyen en a innovazión, a dichitalizazión y l’azesibilidat. En zagueras, son poderosos motors d’educazión, bella cosa esenzial en a construzión d’a comunidat.
Propuestas ta o/a profesor/a
O punto anterior nos aduya a entender millor a transversalidat a la cuala nos convida iste Día Internazional. As posibilidaz que ubre iste tema son infinitas. I hai una ofierta mui amplia d’autividaz didauticas por parte d’os prenzipals espazios museísticos aragoneses.
Entre ellas (nomás como muestra), o dozén puede esplorar:
- Actividat ta escolars d’o Museu de Uesca
- Museu Aragonés de Paleontolochía – Fundazión Dinópolis Teruel: Autividaz didauticas
- Museu de Zaragoza. Ofierta didautica
- IAACC Pablo Serrano (Zaragoza)
- Museu de Teruel
- Museu Pedagochico d’Aragón (Uesca)
- Museu Juan Cabré (Calaceite)
- Museu Pablo Gargallo (Zaragoza)
Belunas disposan de recursos ta treballar a distanzia, visitas virtuals, interautivos…
Tamién puede dar chuego a propia estetica d’os museus, a suya valor como patrimonio arquiteutonico, como edifizios emblematicos, con istoria (por exemplo, por ir nomás a dos casos mui concretos, os museus de Uesca y de Zaragoza tienen muito que contar en ixe aspeuto y pueden aduyar a desarrollar escursions en ixa clau). Puede estar util a consulta d’o libro d’Elena Marcén Os museus aragoneses y a suya arquitectura.
Dillá d’o que o Día d’os Museus (u os días arredol d’o mesmo) pueda propiziar en o treballo d’aula, y dillá d’as ofiertas concretas que permitan una visita de grupo a un museu concreto, l’obchetivo final ha d’estar más ambizioso: contribuyir a la creyazión de nuevos publicos que aduyen a mantener vivo o texiu cultural d’a comunidat. Fablamos de lectors, d’espeutadors y de visitans de museus y esposizions, de potenzials consumidors de productos culturals. Tamién sería ideyal aduyar a desarrollar a curiosidat, u propiziar visitas autonomas d’os alumnos y alumnas con amigos y familiars en cualsequier epoca de l’año.
Unatro elemento atrautivo en o cual se puede insistir ye o carauter interdisziplinar d’os museus (“no nomás cosas antigas”), l’amplia variedat de temas y d’azogue privadas y personals pueden satisfer. Ha de prevaler a idea d’os museus como bella cosa vivo y autivo (mui propizio, como emos visto, ta comunidaz dichitals, rez, recursos online).
En defender as valors democraticas y ofrexer oportunidaz d’aprendizache permanén, os museus contribuyen a aconformar una soziedat zivil informada y comprometida, y en ixe sentiu, a escuela ye fundamental como “trampolín”.
Prenzipios metodolochicos y elementos transversals
Ista propuesta inzide en o fomento d’a creyatividat y d’o pensamiento critico a traviés de fayenas y actividat ubiertas que supongan un reto ta los alumnos en totas as materias. Se propizia d’ista forma o escubrimiento como vía fundamental d’aprendizache, a concrezión d’a interrelazión d’os aprendizaches tanto en cada materia como de forma interdisziplinar, a relazión con l’entorno sozial y natural y a relazión con as familias como achens educativos esenzials.
Obchetivos que aduya a complir ista propuesta
ESO:
- Desarrollar destrezas basicas en a utilizazión d’as fuens d’informazión ta, con sentiu critico, alquirir nuevas conoixenzias. Alquirir una preparazión basica en o campo d’as teunolochías, espezialmén as d’a informazión y a comunicazión.
- Conzebir a conoixenzia zientifica como un saber integrau, que s’estructura en distintas disziplinas, asinas como conoxer y aplicar os metodos ta identificar os problemas en os diversos campos d’a conoixenzia y d’a esperenzia.
- Conoxer, avaluar y respetar os aspeutos basicos d’a cultura y a istoria propias y d’os demás, asinas como o patrimonio artistico y cultural.
- Apreziar a creyazión artistica y comprender o parlache d’as distintas manifestazions artisticas, utilizando diversos meyos d’esprisión y representazión
Bachillerato:
- Utilizar con solvenzia y responsabilidat as teunolochías d’a informazión y a comunicazión.
- Conoxer y avaluar criticamén as realidaz d’o mundo contemporanio, os suyos antezedens istoricos y os prenzipals factors d’a suya evoluzión. Partizipar de forma solidaria en o desembolique y millora d’o suyo entorno sozial.
- Azeder a las conoixenzias zientificas y teunolochicos fundamentals y dominar as abelidaz basicas propias d’a modalidat eslechida.
- Desarrollar a sensibilidat artistica y literaria, asinas como o criterio estetico, como fuens de formazión y enriquimiento cultural.
Materias con as cualas puede vincular-se
- Educazión Plastica, Visual y Audiovisual / Atras asignaturas de carauter zientifico u umanistico-sozial (ESO, 1er y 2º ziclos).
- Dau o carauter interdisziplinar (no esclusivamén artistico), puede adaptar-se a cualsequier modalidat (Bachillerato).
Desembolique de competenzias
- Conzenzia y esprisions culturals.
- Aprender a aprender.