Día Internazional d’a Paz – Agenda escolar digital de Aragón

Esta entrada también está disponible en: Aragonés Català Español Français English

MICOLA Y PAZ

Uns Nadals convidamos a un mediador d’as Nazions Unidas a zenar y se fuo antes d’o postre dezindo que lo de a nuestra familia no teneba apaño. Antes d’o postre. I eba tarta de chicolate. Cuánto desespero cal sentir ta marchar-se antes d’a tarta de chicolate?

Tamién ye verdat que a mía mai eba empezau a arrullar tomates contra a fregadera con bella furia y que o mío chirmán pareixeba estar quitando argumentos d’un debate de Telecinco sobre os zaguers acontezimientos suzedius en Gran chirmán edizión 600 000 y ixo se yera desmadrando.

O pobre mediador no sabeba por dó pillar-nos, asinas que dizió que él no aguantaba más y que a lo de Palestina y Israel le veyeba más futuro que a lo nuestro. Ixo sí, se levó un táper con micolas d’a mía mai, porque no i hai conflicto en o mundo mundial que te tire as ganas de minchar-te unas buenas micolas, ixo ye asinas.

Salió de casa con cuatre micolas en a boca a la vez, movendo a cabeza y temblando como si acabase de salir d’a piszina un día de chinero en Canfranc y me quedé con ganas de dezir-le que yeran muitos años de discusions y ara costaba dixar os rencors dezaga y seguir adebán.

Fixo que t’ha pasau a tu tamién. Seguro que bella vez t’has enuyau por bella cosa que pasó fa tiempo u por bella cosa que t’han feito muitas vezes, a que a toz nos ha pasau?

Si ixo ocurre en una familia cualsequiera, en un puesto do conviven diferens etnias, lugars u simplamén personas con opinions distintas cómo no se va a armar un follón de flipar?

Asinas que prenso en ixos mediadors intentando conseguir a paz mundial y a verdat ye que yo no sabría ni por dó empezar. Lo unico que se m’ocurre ye parar una zena de micolas, que le cuacan a tot o mundo, y asinas se prenzipia de buena umor y s’aclareix o que faiga falta.

Tamién se puede zelebrar o 30 de chinero. Lo fez en a tuya clase? Sigue leyendo ta descubrir por qué ixe día ye o Día Escolar d’a Paz y a No Violenzia.

Descripzión

A Paz ye una idea mui invocada y forma parte siempre d’os nuestros millors deseyos y intenzions. Pero, por desgrazia, a nuestra realidat cutiana ye mui luen d’ixos ideyals. Ye pro con leyer, escuitar u veyer as notizias, o que suzede a lo nuestro arredol u en muitos puestos d’o mundo… ta perzibir a presenzia d’autituz y feitos violentos.

En 1981, Nazions Unidas establió o 21 de setiembre como Día Internazional d’a Paz. En 2001, l’Asambleya Cheneral d’a ONU dezidió por unanimidat designar iste Día como chornada de no violenzia y alto o fuego. Manimenos, adubir a paz verdadera rebaila muito más que deponer as armas. Requiere a construzión de soziedaz en as cualas toz os suyos miembros sientan que puedan desarrollar-se. Implica a creyazión d’un mundo en o cual totas as personas sigan tratadas con igualdat, independienmén d’a suya raza, credo, color, condizión.

Más informazión:

Os obchetivos y contenius d’ista propuesta pueden estar relazionaus con Día Internazional d’o Esporte ta lo Desembolique y a Paz.

En Aragón

En a nuestra comunidat autonoma i hai una larga tradizión de cultura de paz. En os años setanta y uitanta d’o sieglo XX, os risques relazionaus con a menaza d’armas nuclears, a zercanía de campos de tiro y a base norteamericana (en plena escalada de guerra freda entre os bloques liderados por Estaus Unius y a Unión Sovietica), afavorioron que se consolidasen colectivos arredol de l’arreparo de conzenzia y l’antimilitarismo, como o Movimiento por a Paz y o Desarme.

Amás d’ixo, y adaptando-se a un contesto en o cual tamién o papel de l’exerzito (a lo menos en España) ha evoluzionau, funziona dende 1984 a Fundazión Seminario d’Investigazión ta la Paz: un zentro d’estudio que, a traviés de seminarios, cursos, debates, becas d’investigazión, trobadas como as Chornadas Aragonesas d’Educazión ta la Paz, convenios con instituzions, etz. aborda l’asunto dende diferens disziplinas.

Puede veyer-se más informazión, mui interesán, sobre as autividaz d’o SEIPAZ .

Un detalle

Dende fa pro tiempo, o 30 de chinero (cabo d’año d’a muerte de Mahatma Gandhi) se zelebra en os zentros escolars (espezialmén en Educazión Primaria) o Día Escolar d’a Paz y a No Violenzia. As valors implementadas en ixa conmemorazión son plenamén intercambiables con os desprendius d’iste Día Internazional.

Más informazión

O lema d’iste Día Internazional ta 2022 ye “Mete fin a lo razismo. Construye a paz”. O razismo como sustentador de conflicto. Entre os mandaus que se desprenden d’ista prosima zelebrazión, en a web de Nazions Unidas ta iste Día Internazional se diz:

Entre que os conflictos siguen estallando en tot o mundo forzando a muitas personas a fuyir, tamién emos visto inzidens de discriminazión y razismo en as fronteras. (…) S’ha produziu un incremento en os discursos d’odio y violenzia ta minorías racials.

Toz tenemos un papel que desempeñar en o fomento d’a paz. Y a luita contra o razismo ye cruzial ta conseguir-lo.

Treballemos chuntos ta desmantelar as estructuras que afianzan o razismo ye os nuestros entornos. Zelebra a paz. Apoyemos os movimientos que luitan por a igualdat y os dreitos umanos y denunziemos os discursos d’odio, tanto en Internet, como afora d’ella. Reconstruigamos a confianza y a coesión sozial por medio d’a educazión y a chustizia reparadora. (…)

Unir a las Nazions Unidas en nuestro empeñoro de fer realidat a visión d’un mundo libre de razismo y discriminazión racial. Un mundo en o cual a compasión y a empatía supere a la sospeita y l’odio. Un mundo d’o que podamos estar realmén orgullosos.

Proposas ta o/a profesor/a

Visionau y mesa en común sobre videoclips mosicals como os siguiens:

Amás…

Proponer un chicot treballo d’investigazión. Un conflicto que se siga levando a cabo en l’autualidat, bien entre estaus, bien en l’interior d’un país entre diferens achens, bien situazions de rebeldía u de represión… Una vez estriau l’obcheto d’estudio, se puede sucherir una analisi d’as partes que son en conflicto, cuáls son as suyas fuerzas, dende cuán se ye mantenendo?, cuál ye a causa d’o conflicto?, tienen atros refirmes os actors en luita?, qué consecuenzias tiene en a poblazión zivil… i hai refuchiaus?, i hai presión internazional, de Nazions Unidas, d’a Unión Europea, por exemplo?, tiene posibilidaz de soluzión?

Recomendazión: profes a guerra prevocada por a invasión rusa d’Ucraína ocupará a mayor d’as atenzions pero, sin menoscabar a gravedat que sin duda iste conflicto tiene, se recomienda atender tamién a atros conflictos de menor intensidat, desarrollaus en latituz más lexanas, u de singular y alarmán durazión que a bonico van dixando d’estar atendius por os meyos de comunicazión (como si, por no salir en os notiziarios, ya no esistisen). Puede estar interesán, tamién, reflesionar sobre ixo.

Obchetivos que aduya a complir ista proposa

ESO:

Asumir responsablemén os suyos debers, conoxer y exerzer os suyos dreitos en o respeto a os demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
Avaluar y respetar a diferenzia de sexos y a igualdat de dreitos y oportunidaz entre els. Refusar a discriminazión d’as personas por razón de sexo u por cualsequier atra condizión u zircunstanzia personal u sozial. Refusar os estereotipos que supongan discriminazión entre ombres y mullers, asinas como cualsequier manifestazión de violenzia contra la muller.

Bachillerato:

Exerzer a ziudadanía democratica, dende una perspeutiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
Consolidar una madurez personal y sozial que les permita actuar de forma responsable y autonoma y desarrollar o suyo esprito critico. Preveyer y resolver pazificamén os conflictos personals, familiars y sozials.
Fomentar a igualdat efeutiva de dreitos y oportunidaz entre ombres y mullers, analisar y avaluar criticamén as desigualdaz y discriminazions existens, y en particular a violenzia contra a muller y empentar a igualdat real y a no discriminazión d’as personas por cualsequier condizión u zircunstanzia personal u sozial, con atenzión espezial a las personas con discapazidat.

Materias con as cualas puede vincular-se

Cheografía y Istoria / Avalúes eticos (ESO, 1er y 2º ziclos)
Educazión ta la ziudadanía y os dreitos umanos (ESO, 2º ziclo)
Bachillerato: A asignar en funzión de modalidat

Desembolique de competenzias

Competenzias sozials y zivicas