Esta entrada también está disponible en: Aragonés Català Español Français English
NIERVOS VIACHEROS
Qué turra me soltó a mía lola ayer con lo que en a suya epoca no i eba euros. Diz que cuan pasaban a Franzia eban d’ir ta o banco a cambiar diners. Y ixo de mostrar o DNI sin más en meya Europa, ni de broma, caleba levar o pasaporte y a vezes ebas de contar tota a tuya vida en a frontera ta que te dixasen dentrar.
Y ixo yera solo ta pasar ta Franzia!
Ta complicar más o tema, a mía lola se mete d’os niervos cada vez que viachea. Ye una orror. Plega a l’aeropuerto tres años antes d’a salida de l’avión y torna cuatre mil doszientas vezes a por cosas que piensa que s’ha olbidau, pero en realidat levan una semana en a maleta. Ai, os diners, ai, o pasaporte, ai, o bateaguas (no me preguntes por qué, pero ella no se fía d’a previsión d’o tiempo y siempre leva un, anque viachee a Marruecos y den cuaranta graus a la uembra tota a semana).
Asinas que me la prexino fa años pasando a Franzia como si ise a embarcar en o Titanic. Con treszientas maletas, un bául pleno de papels que esplicaban l’itinerario y os obchetivos d’o viache y un contable que s’encargase d’o maneyo d’os francos y o cambio de moneda.
Qué angunia! Con o que mola ir a Olorón a crompar chicolate en Lindt un día sin más que pasas zerca!
Por ixo a yo me mola lo de a Unión Europea, porque m’encanta viachear. Me flipa poder pillar un avión a cuasi cualsequier puesto d’o continén, practicamén con lo puesto y sin preparazión.
A qué puesto d’Europa t’irías mañanada mesmo sin plantiar-te-lo? Yo siempre he quiesto ir a Berlín y me cuacaría estudiar un año en Italia.
Bien se vale que Schuman yera un tío listo y empezó a fazilitar-me as cosas. Quiers saber quí yera y por qué o 9 de mayo se zelebra o día d’Europa? Ye tot más abaixo.
Descripzión
O 9 de mayo de 1950, o ministro franzés d”Asuntos Esteriors Robert Schuman esposó a idea d’una nueva forma de cooperazión politica en Europa que enronase a orror de sieglos de guerra y destruzión entre os suyos estaus. Sin ir más luen, en tasamén trenta años s’eban declarau en o continén os dos conflictos más espantosos y cruentos nunca acayezius.
Con a intenzión de superar ixa memoria amarga y a voluntat de conziliar posturas, a Declarazión Schuman se considera o punto de partida d’o que uei ye a Unión Europea. O 9 de mayo ye, pus, una ocasión ta zelebrar a paz sobre a cuala s’asienta o proyeuto europeu, con a pena de tornar a asistir a un conflicto en suelo europeu ocasionau por a invasión d’Ucraína por tropas rusas.
O reto ye en enfortir as valors d’unidat y solidaridat, y dende astí esplegar ixe esprito ta la resta d’o mundo. Tamién ye en aduyar a desembolicar as capazidaz y competenzias d’as personas (obchetivo zentral d’a UE en 2023). Tot ixo parte d’a base de 2022 como Año Europeu d’a Choventut: l’asperanza ye en o esdevenidero.
Más informazión
Os obchetivos y contenius d’ista propuesta pueden estar relazionaus con os esponius en o Día Internazional d’a Paz (21 de setiembre), tamién de forma más “lateral” pueden relazionar-se con o Día Internazional d’o Migrán (18 d’aviento).
En Aragón…
Aragón ha estau istoricamén un territorio de transito y d’intercambio con a resta d’Europa. Entre atras cosas, ixo ha aduyau a construyir una soziedat mui plural, y muitos retos y demandas se sitúan prezisamén en ixa conisión.
O Gubierno d’Aragón disposa d’una serie de ferramientas ta afondar en o contacto con atras rechions europeas, espezialmén en temas estratechicos, intercambiando ideas, compartindo informazión, buscando obchetivos comuns… (Aragón en os rez europeus). En ixe capitulo desempeña un papel mui importán a Usina d’Aragón en Bruselas.
Europe Direct Aragón ye un punto d’informazión sobre a Unión Europea, endrezau a tota a ziudadanía, a interpresas, asoziazions, escuelas y instituzions publicas y privadas, particulars… dentro d’una amplísima ret. Entre atros cometius, l’Instituto Aragonés d’a Chovenalla canaliza informazión europea y chestiona proyeutos y iniziativas como o Carnet Choven Europeu d’Aragón.
Un detalle
A Cooperazión territorial europea ye l’instrumento d’a politica de coesión que tiene como obchetivo soluzionar problemas transfronterizos y desarrollar de forma conchunta o potenzial d’os distintos territorios. As azions de cooperazión reziben o refirme d’o Fondo Europeu de Desembolique Rechional (FEDER) a traviés de tres componens prenzipals: cooperazión transfronteriza, transnazional y interrechional.
Ta lo periodo 2021-2027, o FEDER en Aragón tiene como lema: “Construyindo Europa dende Aragón” y pretende contribuyir a una Europa más competitiva (por medio d’o fomento d’a investigazión y a innovazión), más verda y sostenible, más conectar, más inclusiva y sozial y más prosima a la ziudadanía.
Una reflesión
Uei día, gran parte de l’achenda politica y l’autividat economica en España y en Aragón ye marcada por as estratechias y politicas europeas. Dende fa dezenios, os fondos europeus (como os proyeutos Leader de desembolique rural, u as aduyas d’a Politica Agraria Comuna, por exemplo), as normativas europeas en moltetut de materias, ezetera, han veniu marcando ixa evoluzión
Pero tamién en lo sozial, educativo, cultural, mental… a idea d’Europa, d’una ziudadanía europea, ye cada vez más asentada, espezialmén entre as nuevas chenerazions: os programas Erasmus d’intercambio universitario, a mayor mobilidat, l’abanz en o dominio de luengas estrancheras, entre muitas atras iniziativas… aduyan a aconformar ixa unidat.
Europa ha de reconoxer-se a ella mesma, pero no zarrar-se a la resta d’o mundo y amostrar-se unida y solidaria a la ora d’afrontar espolons importans (por exemplo, as consecuenzias d’a guerra en Ucraína, a crisi enerchetica, a cuestión migratoria, o control de produzión y consumo, etz.).
Propuestas ta o/a profesor/a
O Día d’Europa puede ir acompañau de propuestas relazionadas con busqueda de documentazión y senzillos estudios arredol d’a istoria d’Europa (relazions entre países a lo largo d’o tiempo, o trauma d’as dos guerras d’a primera metat d’o sieglo XX; a naixenzia y evoluzión d’o Mercau Común; Europa partida en dos dentro d’a politica de bloques; os cambios d’o mapa politico europeu entre o dezenio de 1980 y l’autualidat, l’euro, “Europa como bella cosa más más que a Unión Europea”, etz.).
A politica europea ye un tema recurrén en l’autualidat: as rivalidaz internas, as presas de postura debán de terzers (de forma mui evidén en os momentos de crisis como l’actualmén motivada por a guerra d’Ucraína), entre atras cosas, son a la orden d’o día. Se propone analisi d’a informazión y reflesions a compartir en relazión con cuestions como a politica migratoria y d’acubillaus (i hai un dople radedor cuan os fluxos vienen d’afora? no será Europa en o fondo ye un club de ricos?), a postura debán d’a guerra, os desequilibrios internos (realmén se correxen?).
Ixa dinamica de treballo tamién puede estar levada ta atros ambitos más personals esperenzias propias, viaches… u mesmo a campos a priori más “frivolos” pero orientativos asinasmesmo d’una idea d’Europa y con gran eco popular: as competizions futbolisticas (a Champions, a Eurocopa), Eurovisión (que tamién nos permite meter a muitos países en o mapa)…
Amás, se recomienda l’atenzión a convocatorias y a determinatas autividaz (charradas divulgativas, por exemplo), como as que se programan añalmén y se vienen ofrexendo de forma gratuita a los zentros educativos dende o Gubierno d’Aragón a traviés d’Europe Direct. En o marco dr l’Año Europeu d’a Choventut, se recomienda atenzión a las informazions de l’Instituto Nazional d’a Choventut, destacando iniziativas como a plataforma Youthvoices, a traviés d’a cuala chovens de tota Europa pueden dixar constanzia d’a suya visión d’Europa, cómo de zerca u luen se sienten d’as politicas comunitarias d’emplego, amás d’atros temas como a mobilidat u o clima.
Elementos transversals
Se fomentará l’aprendizache d’a prevenzión y resoluzión pazifica de conflictos en toz os ambitos d’a vida personal, familiar y sozial, asinas como d’as valors que sustienen a libertat, a chustizia, a igualdat, o pluralismo politico, a paz, a democrazia, o respeto a los dreitos umanos y o refuso a la violenzia terrorista, a pluralidat, o respeto a lo Estau de dreito, o respeto y considerazión a las victimas d’o terrorismo y a prevenzión d’o terrorismo y de cualsequier tipo de violenzia. A programazión dozén ha de comprender en tot caso a prevenzión d’a violenzia de chenero, d’a violenzia terrorista y de cualsequier forma de violenzia, razismo u xenofobia.
Obchetivos que aduya a complir ista propuesta
ESO:
- Asumir responsablemén os suyos debers, conoxer y exerzer os suyos dreitos en o respeto a os de demás, prauticar a toleranzia, a cooperazión y a solidaridat entre as personas y grupos, exerzitar-se en o dialogo, afianzando os dreitos umanos y a igualdat de trato y d’oportunidaz entre mullers y ombres, como valors comunas d’una soziedat plural, y parar-se ta l’exerzizio d’a ziudadanía democratica.
- Comprender y espresar-se en una u más luengas estrancheras de manera apropiada.
- Conoxer, avaluar y respetar os aspeutos basicos d’a cultura y a istoria propias y d’os demás, asinas como o patrimonio artistico y cultural.
Bachillerato:
- Exerzer a ziudadanía democratica, dende una perspeutiva global, y alquirir una conzenzia zivica responsable, inspirada por as valors d’a Constituzión española, asinas como por os dreitos umanos, que fomente a corresponsabilidat en a construzión d’una soziedat chusta y equitativa.
- Espresar-se con fluidez y correzión en una u más luengas estrancheras.
- Utilizar con solvenzia y responsabilidat as teunolochías d’a informazión y a comunicazión.
- Conoxer y avaluar criticamén as realidaz d’o mundo contemporanio, os suyos antezedens istoricos y os prenzipals factors d’a suya evoluzión. Partizipar de forma solidaria en o desembolique y millora d’o suyo entorno sozial.
Materias con as cualas puede vincular-se
- Cheografía y Istoria / Avalúes eticos (ESO, 1er ziclo)
- Cheografía y Istoria/ Educazión ta la ziudadanía y os dreitos umanos (ESO, 2º ziclo)
- Bachillerato: A asignar en funzión de modalidat
Desembolique de competenzias
- Competenzias sozials y zivicas