Esta entrada también está disponible en: Aragonés Català Español Français English
ROLLOS POETICOS
A yo a poesía me pareixe un rollo. A metat d’as vezes no sé de qué fabla y l’atra metat… tampoco, a verdat.
Una vez un expierto me dizió que a metat d’os poemas fablan de l’amor y l’atra metat d’a muerte. Cuasi me quedo dormida nomás de pensar-lo, tota a poesía que s’ha escrito se reduz a dos temas? Te prexinas que totas as pelis que s’han feito se reduzisen a dos unicos temas? Bai, aborrimiento.
Y no molaría que a poesía tratase atros temas? Que se pasase l’amor y a muerte por o forro y fablase de bella cosa que entendesenos toz como ir-se de tapas u fer cadagún as suyas nezesidaz?
Pero no, ixo no se puede, fixo que no i hai poesías sobre ir a lo baño, a que no?
“[…] Pixan as fuens... Por a luz fumea una ardién pixada cristalina... y alzo a esgarrapadera... Pus me soi pixando.” Rafael Alberti
Una poesía sobre pixadas? En serio? Ara ya, me dizes que se fan poesías con reniegos y me vuela a cabeza:
“A la mierda o conformismo: yo no quiero estar memoria. Quiero estar o tuyo amor imposible, a tuya dolor no correspondida, a tuya musa más puta, […]” Elvira Sastre
Me soi quedando patidifusa, me salen palabras raras y tot. No yera a poesía ixo de rimar chorradas ta conquerir a la tuya amada? Tamién se puede fablar de mizions y dezir puta? Isto ya me va intresando más…
En Aragón tenemos poetas famosos? A lo menos un, busca-lo más abaixo.
Descripzión
Dende l’año 2000 tiene puesto a zelebrazión d’iste Día Mundial. D’ista forma, a Unesco reconoxe a valor d’a poesía como forma d’esprisión utilizada por a Umanidat dende tiempos inmemorials, como catalizadora de paz y de dialogo y como amuestra d’a diversidat lingüistica.
Prauticada a lo largo d’a Istoria, a poesía fabla de valors compartidas. A poesía une a los lugars, trenca fronteras, fomenta la visibilidat de luengas que se troban menazadas y nos aduya a desarrollar a nuestra sensibilidat. Grazias a ella podemos comprender o mundo en dimensions más enriquidoras, que superan os criterios d’efizienzia y productivismo que a vegadas nos afogan.
Más informazión
Os contenius y obchetivos d’ista propuesta pueden meter-se en relazión con a zelebrazión d”o Día d’o Libro (23 d’abril). Tamién tienen fazil acomodo con o Día d’a Luenga Materna (21 de Febrero) y o Día Europeu d’as Luengas (26 de setiembre).
En Aragón…
A poesía, como a mosica, ye un parlache universal. Por ixo prezisamén, dende lo local ye posible trencar fronteras y plegar a tot o mundo a traviés d’a palabra. A inspirazión puede estar en eszenas y en vivenzias cutianas, en o nuestro entorno más prosimo, y proyeutar-se ta puestos lexanos en os cuals tamién puede estar interpretau como zercano.
En Aragón emos teniu (y seguimos tenendo) grans poetas, estupendas editorials espezializadas en poesía, zertamens prestichiosos y atras iniziativas mui diversas que meten de manifiesto una gran vitalidat.
Miguel Labordeta esplora lo intimo, o suyo puesto en o mundo, pero tamién treslada as suyas ideas de ziudadano d’o mundo. Aquí podemos saber muito más sobre iste poeta, sobre a suya chenerazión, sobre as suyas influenzias…
A poesía puede tresladar sentimientos que van de lo intimista y personal dica lo más colectivo, incluyindo a reivindicazión politica u sozial, o servir d’altavoz a los menos desfavorecidos, o clamar l’atenzión d’os poderosos u as demandas d’o territorio.
A obra de José Antonio Labordeta, os suyos versos y as suyas cantas (que tamién son poesía), son un exemplo d’ixos multiples enfoques y lecturas. Tamién aquí ye posible amplar ixa informazión.
Un detalle
The booksmovie ye una pachina web conzebida dende Aragón, a modo de plataforma virtual, libre y gratuita, que contiene gravazions de literatura poetica contemporania, rezitada por os suyos autors. Predomina o castellano, pero tamién son presens nuestras atras luengas propias (aragonés y catalán) y unatra veintena larga d’idiomas de tot o mundo.
Una reflesión
O Día Mundial d’a Poesía ye una ocasión ta onrar a los poetas, ta revivir tradizions orals, ta promover a lectura, a escritura y a conversazión. A enseñanza d’a poesía va d’a mano con atras artes, como o teatro, a mosica, a danza, a pintura… A poesía ye palabra, y en a palabra ye nuestro estar. A creyatividat nos fa más libres y nos descubre nuevos mundos y diferens formas d’entender-nos.
Propuestas ta o/a profesor/a
A poesía ye un importán refirme en a nuestra formazión como personas: ye una escuela de ziudadanía. Ye en cualsequier manifestazión mosical que pueda encaxar en as preferenzias d’adoleszens y chovens: en o pop y o rock, en o rap y en atras mosicas urbanas…, s’escubre en os rez sozials que más utilizan, bella cosa dreito, d’alcanz y consumo inmediato, breu. Ye, amás, un instrumento de relazión y sozializazión y d’aduya a la integrazión.
En ixe sentiu, puede estar abordada dende multiples anglos y propiziar actividat cooperativas en l’aula.
Seguindo un camino bella cosa más trillau, pero interesán, en ficar en a suya trama a inzidenzia d’a poesía en o mundo educativo y meter-lo en relazión con valors como a libertat de pensamiento y a creyatividat, puede veyer-se en grupo a zinta O club d’os poetas muertos (Peter Weir, 1989) y compartir un charrada a la suya finalizazión.
Proliferan muitos blogs de poesía sobre os cuals se puede treballar en clase (por exemplo, os sucherius en a web Educazión 3.0), prener referenzias más chenerals como o Plan Lector Secundaria d’a plataforma Loqueleo, u levar a poesía a actividat como publicazions, rezitals, concursos… Ye posible que o zentro siga integrau en iste interesán proyeuto colectivo, Poesía ta levar, a lo que s’han incorporau pros zentros educativos aragoneses.
Elementos transversals
Sin perchudizio d’o suyo tratamiento espezifico en cualques d’as materias d’a etapa, a comprensión lectora, a esprisión oral y escrita, a comunicazión audiovisual, as Teunolochías d’a Informazión y a Comunicazión, l’emprendimiento y a educazión zivica y constituzional se treballarán en totas as materias de conoixenzia.
Prenzipio metodolochico: O fomento d’a creyatividat y d’o pensamiento critico a traviés de fayenas y actividat ubiertas que supongan un reto ta los alumnos en totas as materias.
Obchetivos que aduya a complir ista proposa
ESO:
- Comprender y espresar con correzión, oralmén y por escrito, en a luenga castellana y, en o suyo caso, en aragonés u en catalán d’Aragón, testos y mandaus complexos, y iniziar-se en a conoixenzia, a lectura y o estudio d’a literatura.
- Conoxer, avaluar y respetar os aspeutos basicos d’a cultura y a istoria propias y d’os demás, asinas como o patrimonio artistico y cultural.
Bachillerato:
- Afianzar os costumbres de lectura, estudio y disziplina, como condizions nezesarias ta l’eficaz aproveitamiento de l’aprendizache, y como meyo de desembolique personal.
- Dominar, tanto en a suya esprisión oral como escrita, a luenga castellana y, en o suyo caso, l’aragonés u o catalán d’Aragón.
- Desarrollar a sensibilidat artistica y literaria, asinas como o criterio estetico, como fuens de formazión y enriquimiento cultural.
Materias con as cualas puede vincular-se
- Luenga Castellana y Literatura / Luengas Propias d’Aragón (ESO, 1er y 2º ziclos)
- Luenga Castellana y Literatura / Luengas Propias d’Aragón / Atras en funzión de modalidat (Bachillerato).
Desembolique de competenzias
- Competenzia en comunicazión lingüistica.
- Conzenzia y esprisions culturals.